基本上以家每次有人問我做邊行，我都係答：Freelencer。隔離果個每次都內心冷笑望住我，然後代答：補習。雖然我都笑而不語，但內心極度翻騰！補習其實係咩？
「補充練習？補助溫習？補足學習？」總之就係除了正規上堂時間之外，額外既、應付學業既、再加有另外一個人幫你既呢－就係補習。如果係呢個定義既呢？即係話，係正規教育時間內，「假設不是老師或退休老師的問題」同學要補習的話，就係因為學校對同學的教育未能符合個人需要、未能滿足成績要求、未能滿足考試要求等等等或老師問題…….
係LS通識既角度出發，我會答你「補習」的成因可以係：日校人數過多、朋輩影響、未做到因材施教、教育制度有缺陷、考試為本呢堆野……從我狹小的觀察角度，其實就真係好簡單，學生會補習得一個原因：
1. 佢真係唔識 2.佢真係唔知點樣可以考好D
會補習好簡單－目標為本：高分，即係校內考試高分及DSE高分。
呢個年代，係全民補習既年代，當年我除左自己好叻既科，基本上我都係有補習的。數學係我天敵，我中學時代補習既數學天王以家都仲在執業中。我以家上堂既同學入面係有補曬7科的，原來可以誇張到有幾科係會有三個老師：學校一個、補習社一個、私補一個！真心祝願小三TSA可以廢除，只少香港小朋友的惡夢可以遲多1-2年先開始。其實係咁既情況之下，究竟邊個老師先係「補習」呢？
我從來都唔認自己係老師的，雖然有教無類我一定係。但我始終認為教育是不應商業化及被標價的！只是香港的教育做不到，我在德國讀書時，老師、教授地位極高。所以我只是傳授考試、學習技巧及知識的人，同學同我係平輩。文學院出身的我，有好多朋友都係日校教書，全都是好熱心的人，為到一起在這個操練死學生、家長、老師及所有人的教育制度下，祈求大家都唔好死吧。