原來Emileo係深圳政協，失覺曬。
不過政協係咩嚟呢？事實上，好神秘。有人話做政協唔算從政，但政協全寫係「中國人民政治協商會議」，「政治」兩隻字大大隻喺度，係唔係從政就真係Emileo Knows嚕。
好啦，今日都係講返一件事：政協係咩嚟？其實政協好神秘，作為一個高級嘅政治組織，喺《中華人民共和國憲法》內除科幻小說一樣嘅序文之外，並無任何一句提及政協，而對政協嘅描述就只有講佢係「有广泛代表性的统一战线组织」一句。咁到底政協係咩嚟？點解老董做政協副主席會係國家領盜人？點解做政協即係同意中共統治呢？咁就要返去1945年。
所謂「政治協商會議」，本來係中國內戰前夕，國民黨同共產黨談判而產生。雖然話當年國民政府都係一黨專政，但又毋可否認國民黨嘅一黨專政又係有民主化路線圖，就係孫中山《建國大綱》所提出嘅「軍政→訓政→憲政」三步曲。
用國民黨同中華民國政府嘅說法，民國六年至民國十七年，成立軍政府，以北伐戰爭推翻北洋政府為「軍政」，以軍治國，達成統一；北伐結束之後，國民政府要負責準備民主社會，於全國各地建立自治組織，宣揚民主憲政，謂之「訓政」，而民國十七年至民國三十六年，就係「訓政時期」，憲法係《訓政時期約法》；民國三十六年十二月二十五日正式結束「訓政」，三十七年五月二十日國民政府改組成中華民國政府，結束國民黨一黨專政，進入「憲政時期」，成立民主政府。但由於五月十日頒佈《動員戡亂時期臨時條款》，令實際行憲延至民國八十年。因此，技術上中華民國自從1948年起就係民主國家，不過長期處於緊急狀態下所以一切民主制度暫緩執行。
講返政協，政協其實就係因為國民政府意識到訓政係時候結束，又已經因為二次大戰無力再戰，不得不去同八年內由八千兵力變成百萬大軍嘅中共談判。重慶談判嘅結果，就係要召開「政治協商會議」，決定中國前途。
重點就係呢度：「政治協商會議決定中國前途」。
政協最後，有四大黨派參加。手上有兵嘅國共兩黨當然有參加，然後就係中國民主同盟同埋中國青年黨，最後當然有無黨派人士參加。呢次政協開到最後，中共都係同意嘅。但同時中共仍然不斷四出搶佔國民政府未能控制嘅地區，尤其是蘇佔嘅東北九省；當然國民黨亦都唔會唔知，企圖發力阻止。因此雙方軍事衝突無日無之。
政協決議要開「制憲國民大會」，決定《中華民國憲法》，正式結束訓政。然而，國共又未停戰，而且內戰越打越大。本來互相仲有談判，但當中共發現戰況有利自己，就索性獅子開大口，以各種過份要求令國民政府無法接受佢哋嘅條件，然後直接國民黨違反決議。最後，中共同手下左膠大黨民主同盟索性唔出席制憲國民大會，以便日後宣稱《中華民國憲法》係偽憲法1。
內戰結果我哋好清楚，中共打贏咗，而中共為咗表現自己係「民主派」，就喺1949年，聯同國民黨左派、民主同盟、致公黨等人再開一次政協，以「全國各黨派一致同意」嘅「支持」建立一個由「中共領導」嘅「多黨制」體制，國名係「中華人民共和國」。1949年新政協──亦即係今日所見嘅「中國人民政治協商會議」──就係將中國法理上交由中國統治嘅會議。
而且，中共亦保留呢個理應係四十年代為解決中國前途問題臨時召開嘅全國大會，用以不斷授權自己統治中國。呢個本來只應係全國性嘅臨時大會，更加細分成各級政協，結果又有全國政協、省政協、市政協、縣政協、基層政協。產生方式唔重要，因為全部都係政治酬庸用，甚至係畀人發財立品用──同清朝商人發達出錢捐官差唔多。
既然政協係咁一回事，一開始嘅問題就迎刃而解：
因為政協法理上決定中華人民共和國存在，所以政協高層應該算係領盜人。；因為政協就係中共為咗自己可以不斷獲得授權而開而保留，只要係政協就即係同意中共存在。事實上中共根本就唔care政協做緊咩同做咗咩，因為一嚟佢哋咩都做唔到，二嚟只要開會佢哋決議「中共做得好」就夠。陳政協講咩笑佢哋青年工作差，根本don’t give a shit。
好啦，其實做政協係中共明屈嘅，有時係你唔想做都要做，巴金當年成百歲想唔做政協都唔得。不過呢，又聽聞曾志偉做江門政協都從來唔去開會，最後畀人屌完就話唔做；周星馳都應該都好少去廣東政協，因為去親就變影迷會。既然政協開會咁兒戲，大陸人一直都對政協好冷漠，人人都知政協係廢嘅，做政協嘅人都心知肚明。
但咁係唔係就係唔從政呢？中共就係想要你個人頭嚟keep住授權畀佢，有名就得，你交咗名嘞，又算唔算「冇從政」呢？真係咁唔重要，又唔見北京任命我？
- 所以香港好多「民主派」仲未杯葛任何會議，真係好「反共」……