（photo via cc Flickr user Wonderlane）
話說今次係補習嫩青與老醫生的比拼了！
補習界的人通常朝早都好得閒。其實有數得你計，晨早流流個個都番曬學校啦，邊個得閒上堂補習。但千祈千祈唔好以為我地好得閒，下次寫篇補習界血淚史，你就知補習好難做。番番正題，不過就係因為朝早正常都真係無工開，所以就發生了今次恩恩變廢青事件。
因為天生孤寒，所以其實我係絕少睇醫生的，不過拖了一晚半寒半熱、轉輾反側同係咁咳之下，又在我家母親大人半打半罵下下，又再加上之後要上中六常規班，喉嚨不能失守下下下，星期一一早就落到樓下診所！
推門～
姑娘：咩事？
恩：睇醫生（心想：除非唔係囉！）
姑娘（一路登記一路問）：唔駛番工咩？
恩：唔駛（心想：姑娘，其實我病。）
姑娘：坐低等嗌名！
—醫生用左1分鐘檢查我— 然後我地零交流—
最後…..
醫生：感冒
—再零交流左1分鐘—
醫生：…ok ga la
恩：唔該醫生（起身走）
醫生：（嗌停我）唔駛假紙？
恩：唔駛呀
然後，剛剛同我零交流的醫生，真係突然用了好怪異的眼光望住我。然後，在果一刻，不知為何，「廢青」兩個字在的腦海中浮現了出來。我唔知點解好尷尬咁離開了診症室。在等藥時，就明白到標籤效應就是這樣形成的。
因為，對補習人而言，星期一射波問題係不存在的。基本上一星期7日，除左放假及考試高峰期，根本不會有人朝早俾工你開。
然後，對補習人而言，醫生紙亦係唔會有作用的。
例一：補私人的，你有無醫生紙，家長都會一樣的嫌棄你病，會因為改期令到小朋友的時間表亂曬，唔知點樣可以補到堂。（當然有好家長）
例二：上小組的，亦無人會care你病定咩事，總之請假就要安排補堂。（當然有好學生）
但是，若果在星期一的早上看醫生，無論如何你也是會被歸類為「射波」、如果你睇醫生但係又唔要假紙就會變左係「廢青」。究竟係病好恐怖、星期一好恐怖、醫生好恐怖定我地果社會太恐怖？
後記
上一回講左我唔認為自己係老師，反而答自己係：Freelancer 之後，被一眾「真的Freelancer」嚴肅認真向我講解Freelancer的定義及訓斥我不準再答後，我唯有另覓答案。隔離果個其實好心哄左我好多次，話我答老師其實也是合情合理的。不過我始終都答唔出口，思前想後唯有改口答：「我教書的1。」
所以恩恩現在是教書的廢青了。
- 編按：跟手「真的教書」就會問你CM 定GM架喇，唔好死…….