（photo via cc Flickr user Trang Angels）
同男朋友分隔異地，最難頂嘅莫過於無身體接觸——即係無得扑嘢，而本身扑嘢係我哋兩人之間相處嘅重要一環：需知道，遇到人世間好多唔可以解決，只好接受嘅問題嘅時候，扑嘢可以令你暫時忘記煩惱（雖則佢唔可以幫你解決問題）。好啦。Long D，咁無辦法扑嘢——所以我哋就決定將段關係變成open relationship，即係換言之大家可以各自搵SP 解決性需要。
其實都真係經過深思熟慮先有呢一個決定。講真，好多嘢都好似一個賭注，你點知自己／男朋友會唔會同其他人扑嘢扑到沉船？當然，我會覺得，其實都係講一個信字（自問自答環節又開始）——信佢唔會同人沉船。如果佢真係同人沉船，咁都無辦法——大佬，佢重視而家同人有得扑嘢多過我，咁而我又真係比唔到佢，咁都無計㗎係咪先。咁咪即係有緣無份囉。
之後有好多身邊嘅朋友問我：「喂，你唔係好愛你男朋友㗎咩，你唔會自願地將自己只係留比佢？」當然，我都有質疑過到底自己有幾鐘意佢，「咦，連呢種exclusiveness都可以放棄，到底其實你有幾鐘意佢㗎？」
但其實正正就係因為大家都好鐘意對方，所以先唔會想比主流嘅戀愛制約縛住自己所愛嘅人。（主流嘅戀愛制約：即係平時一對一，你唔可以同伴侶以外嘅人上床。）
當然，我唔會知道呢一種關係去到最後會唔會行得通，但唔見得主流嘅戀愛制約喺我地身上會行得通——皆因我地兩個都係非常之大食嘅人，如果用傳統方法，只係會搞到個人超級心癢，出軌，之後好內疚，之後就會頂唔住個壓力講分手——而明明解決性需要係冇咩值得內疚嘅事（okay ，強姦另計）。明明兩個都有需要，咁不如比返啲自由大家好過。
另外，我地出去搵SP 並無放棄我地關係重要嘅一環，正因為佢重要，我地容許大家搵SP係可以增進大家嘅關係。譬如，我同人扑完會同我男朋友分享返經歷，有咩學咗遲啲可以試，有時仲會講得好興高采烈，就例如我男朋友聽到我同人點扑嘢，佢自己都扯哂旗（我都唔明點解會係咁）；又或者係試過唔同人之後就係覺得自己仔仔嘅手指功力都係未有人及得上；同埋都會發現唔係真係有咁多男人會好似我男朋友會花心機喺前戲上；但同時間我又會覺得我仔仔對我未夠S，可以改進改進－而所有嘅「心得」都係真係出去玩過，通過比較先會知道。
慢慢玩耐咗，就會發現同其他人扑嘢都係只係肉體上嘅關係，出面啲仔仔更大隻，子孫根更粗壯，都唔會及屋企嗰個扑嘢咁正－因為佢始終先係同你有心靈交流嗰個人－佢未百分百了解你，但係佢會嘗試去了解同明白你，而呢種心機同關愛亦都係我地用嚟bound住大家嘅嘢，而唔係sex。
當然，我亦都不能夠百分百保證呢一種戀愛模式係適合所有人，就好似容總鍾意日日食鴨，但我就接受唔到一樣；呢個世界有咁多唔同種類嘅嘢食，可以望下個餐牌，之後再慢慢諗下咩會啱自己口味－你唔一定要試哂佢先知自己鐘意食咩，但係如果聽落去好食，咁咪去試下囉－而唔係個餐牌都無望諗都唔諗就一世食一種嘢食㗎嘛，你又唔係容總，唔洗只愛食鴨（好似係）