（photo via cc Flickr user Guian Bolisay）
「我朋友話淘寶啲婚紗都好靚好多款，唔講根本唔知係淘寶貨！仲有婚紗相呢，可以搵我朋友影，佢久唔久都會周圍去影吓相。」Mike說。
「我唔要淘寶婚紗！我唔要搵朋友用傻瓜機影婚紗相！我唔要呀！如果一生人一次嘅婚禮要搞到咁寒酸，我寧願唔結！」Brenda說，並竟氣憤得差點哭出來。
「其實我都係講吓啫，你唔使咁激動住，咁我地錢唔多嘛，要諗諗計先得㗎喇。」Mike安慰她說。
「如果要慳，一係慳酒席啦，唔好去啲咩幾星級酒店，去酒樓。」Brenda說。
「係喎，有啲酒樓無新娘房，嗰隻就最平喇！」Mike靈機一觸地說。
「吓，咁我去邊度換衫？」Brenda擔心地說。
「Er…我都唔知呀哈哈！」Mike嬉皮笑臉地說。
好多人拍拖明明好哋哋，但一開始籌備結婚就嘈交，最後仲散埋。其實好多女人都願意和男人一起捱，只是捱過三年又三年後，女人青春不多，便會開始害怕、動搖，別怪她們，現實中誰不現實？誰不自私？良禽擇木而棲。你以為愛情真係飲水飽？唔好傻啦！現實中樣樣都要錢，錢不是萬能，無錢卻是萬萬不能。買樓要錢、結婚要錢、衣食住行樣樣都係錢，連買個麥記食都係錢！拍拖初期當然平安無事，但到結婚就唔同喇，結婚是兩個家庭的事，還有一大堆姨媽姑姐同學同事朋友，人人都會加把口，好似自己係婚禮嘅主角一樣，可能你會話，唓，使乜理佢地講咩啫？豬朋狗友就話可以唔理啫，阿爸阿媽外母外父呢？你係咪夠膽唔理先？有錢唔係唔使煩，係煩少啲，因為你鍾意點就點，唔使樣樣計住計住，仲可以搵wedding planner幫你一炮搞掂晒。
朋友係攝影師的話，無錯係會平啲，但係影得唔好你又敢唔敢出聲話佢先？分分鐘佢話返你轉頭：「友情價，仲想點？」然後比人唱足三百六十五日，話你係個麻煩港女。每個人對結婚都有不同意見，有人覺得一生人一次，一定要盡力做到最好；有人覺得budget有限，慳得就慳，平有平結啦，例如好多嘢都可以淘寶，例如婚紗，件件差唔多啫；酒樓就搵間普通啲，無新娘房嗰啲，慳好多；婚紗相？自拍館咪得囉。可能有人會覺得你巧叻叻，諗到辦法慳返咁多，但好可惜，如果係我，認真，我都寧願唔結。
男人要面，女人都要，我唔係想充大頭鬼，明明無錢都要借錢去五星級酒店搞個超級豪華的婚禮，有啲乜鬼升降檯紅地毯，在我看來，只有婚紗和婚紗相是我最堅持的事，婚紗我不用甚麼名設計師，但至少不要淘寶，起碼讓我有機會試上身看看；婚紗照我不用出國拍，我覺得香港反而是最有回憶的地方，留港拍便可以，但至少找個專業少少的攝影師，有portfolio看看，而不是大機都無部，仲差過影cosplay龍友的業餘攝影人，亦最好不要是親朋戚友，以免傷感情。不過講到尾，女人都係善變，可能有一日當我老咗無晒bargaining power嘅時候，我就會覺得乜都無所謂，求其有人肯娶咪算囉，然後我就會將以上所有條件拋諸腦後，可惜那時的我已經不再是我了。