有件事我發現咗好耐，公司有好多同事，會將啲「假期屎」特登留到星期一返公司先一次過解放。
究竟呢個係對公司有歸屬感嘅表現？
定抑或係將一直積聚喺體內嘅怨氣，又唔敢喺老闆面前講，只能夠喺公司馬桶宣洩作無聲抗議？
我真係睇唔透…
我淨係知道…我好急屎！而男廁三個廁格…都無沖廁。
我唔知咁樣算係有公德心，定係無公德心。
因為同事們就算唔沖廁，都會冚埋個廁所板。我唔明白咁做有乜意義，根據人體力學，我相信冚板所消耗嘅能量應該多過撳制沖廁。
是鳩旦旦啦，總之公司某幾位同事就係屙完屎無沖廁，但又冚埋個廁所板。
每當我入到廁格，打開個廁所板諗住除褲嘅時候，見到一幅抽象派嘅屎噴畫…嗰種心情真係難以形容。
我覺得幫同事沖廁簡直係喪家犬嘅行為，所以我只好含淚緊閉住三隻眼，行返出廁所。
我成朝喺公司無做嘢，亦食唔落個早餐，一直沉思緊呢個嚴重嘅問題…
應該怨邊個？係邊度出現咗問題？最後，我決定歸咎於社會！
好多區議員，明明個社區出現好多問題，成地糞便…
但佢哋唔會想辦法將舊屎沖走，而係不斷增設上蓋遮住啲屎。
不過老實講，老人家又好鬼鍾意佢哋住個區好多上蓋，因為就算啲屎臭，起碼都唔會畀太陽曬親嘛。