西曆2015年…..
呢一句Neon Genesis Evangelion嘅開場白，廿年前推出電視版及電影The End of Evangelion時，已經令我印象深刻。最近同一位來自美國德州，年僅廿二嘅研究院女同學傾計時，被佢知道我有EVA電視版DVD時，佢竟然問我借嚟睇，佢仲同我講呢套喺佢同佢啲同學仔都知道嘅經典！無論點講，Evangelion最少影響咗三代人。
其實喺Evangelion嘅世界觀，呢個世界已經被上一代人（例如碇源堂同Seele呢班老人家）搞到亂七八糟，而人類未來係要靠一班年輕人去支撐。呢個世界觀，如果套入今日香港情況，其實有八九分相似。
EVA嘅世界中心，就係第三新東京市，亦係Second Impact之後嘅世界中心。表面上第三新東京市極之繁榮，不過喺佢成立嘅第一日開始，就註定喺會被破壞。點解？因為第三新東京市嘅地底就囚禁著Lilith，而Lilith就會喺末世時吸引各使徒去搵佢去啟動Third Impact。再者，第三新東京市係由Nerv所控制，市民只係一群被愚弄，等待末世降臨嘅人。
第三新東京市，亦係香港嘅寫照。1997後嘅香港，表面上亦係風光，不過港府喺政策上不以市民需要為主導，反而事事迎合中共意思，同Nerv一樣，表面上為防止Third Impact，而實施上就係為咗執行Seele嘅人類補完計劃而行事（雖然碇源堂對Seele嘅要求陽奉陰違，有自己嘅一套，不過亦唔係為民著想），基本上一模一樣。而好不幸，後97嘅香港喺中國及西方世界眼中，亦已經變成一個類似第三新東京市嘅戰場：唔少西方國家希望香港會成為令中國和平演變嘅Trojan Horse；而中國就想用50年時間用盡香港去吸外匯，而同時主事中共政權嘅北方漢人亦唔容許香港發展去去主導中國經濟（因為唔想香港真係成為Trojan Horse)。由於呢個佈局，除非香港獨立，否則只會成為戰場。
而更重要，造成今日香港嘅慘局，亦源於八十年代一班大中華份子出賣香港人，控制輿論，放棄咗香港自治公投嘅可能性，拱手讓中國annexed香港。當年甚至到今日主宰香港政局嘅政客，大部份都喺抱着過客心態嘅人，諗著搵完錢就走。喺佢哋眼中，係無諗sustainability management嘅概念，佢哋甚至可以出賣下一代嘅權益，去賺到盡。呢啲嘢，大家喺2015年發生喺香港嘅事上，可見一班：高鐵加碼，網絡23條，甚至全民退保，都係八十年代開始當權嘅一班大中華份子一代，以割禾菁方法，去賺到盡嘅行徑。
到底香港人（無論藍絲黃絲）知唔知香港嘅真實情況？Well，我覺得係知，不過香港人每每以和理非非呢個方式，去啟動自己嘅「絕對領域」，麻醉自己，覺得只要搵夠錢就得。呢個心態，更將香港推去死局。
我相信，喺香港有唔少中年人好似我一樣，好願意做Evangelion入面加持同美里嘅角式，去守衛下一代香港人，去為佢哋開路同擋箭。呢個亦係我由兩年前開始喺輔仁及其他媒體寫文，去提倡香港人要追求真正港人治港，以及提出用獨立公投去解決困局。呢一個亦喺年近半百嘅我，唯一可以為下一代香港人做嘅事。
到底，2016年會喺點？香港最後會係點？呢啲嘢唔喺大家只坐低喺道齋諗，係要落手落腳做嘅嘢。改變要有契機，而我希望兩星期後嘅台灣大選會如我所料，睇到國民黨全軍覆沒。呢樣嘢會令港台中嘅關係出現變化嘅契機，可能會令中共改變對香港嘅政策；而亦可以為2016年下半年嘅香港立法會選舉，帶來變數。
喺呢一分鐘，我正睇緊新EVA電影版最後一段，講緊屋島作戰計劃。我只諗到我呢一代人要做嘅，就喺EVA零號機，作為護盾，去保護下一代去改變香港。
祝香港人必勝。You are not alone。