（photo via cc Flickr user Courtney Carmody）
「愛若能夠永不失去，何以你今天竟想找尋伴侶」——好明顯，呢個Facebook Status，係我前度寫嚟串我的。佢甚至同D朋友講，咁快就搵到食，之前講咩幾愛幾愛都係假架啦。
係，我係有新歡。但我哋好似分咗手一年喇喎。一年時間，365日，其實一D都唔短。起碼一年前Chirs Chung仲係立法會議員；一年前特首地位都仲未係咁超撚丫；一年前……我仲同緊你一齊。
係，我係有新歡。但我同新女朋友有幾夾幾開心，唔等於要抹殺我同你以前經歷過嘅所有嘢。我同佢去旅行攀雪山潛水單車環島，我一樣陪過你自駕遊滑雪睇日出；我同佢有情侶手錶，我一樣記得舊年情人節點偷偷地去整情侶皮革銀包送比你；我出完街會揸車送佢返屋企，以前我都有次次熬地鐵送你返天水圍再返小西灣港九新界一日遊丫。
係，我係有新歡。但究竟你識唔識中文，我識咗第二個同以前嘅嘢有咩關係？我「從來」都無愛過你？？咁你從來都唔講道理架喎。（關於女人「從來」嘅用法，請參考黃子華嘅演繹）
你亦唔好問我而家仲愛唔愛你。愛同唔愛，唔係啪個燈掣咁簡單。一齊行咗四年嘅路，唔係 一分手就話唔愛，我一同新女朋友亦唔係啱啱一齊就會山盟海誓。現實歸現實，係咪同你分開，我就唔洗做人丫？我曾經好愛你，可能係啦。但既然離離合合一千次最後都係分開，有幾愛都好，唔通我就要Lur地爆喊、等你回頭直到天荒地老？大家都知道，Never say never。過去覺得好愛、甚至最愛嘅人，有一日或者時間會沖淡一切，會有新人勝舊人，但當時嘅心意仍然係千真萬確。
分手，無論誰對誰錯，雙方都唔會開心得去邊。所謂君子相分，不出惡言。我無博同情媾女，你都無謂再消費我哋分手嘅事嚟呃Like。過去嘅嘢，吳好問，吳好緹，亦吳廣德——由得佢靜靜地淡去好嗎？