《男人四十》林嘉欣一句「林耀國，我要罰你留堂」成為經典，相信冇咩人會覺得張學友情陷林嘉欣嘅故事核突，但個故事嘅現實版就完Q全唔係呢回事。
同樣係男人四十，同樣係有老婆同個仔，同樣係中年阿sir 俾個少女玩謝，但似乎冇人同情佢地。
睇高登就話係個女仔嘅真．男友報復，所以將啲wechat cap 圖同開房合照放上網，呢個真．男友都算仆街，咁樣爆人陰毒，真係玉石俱焚，佢唯一值得同情嘅就係綠帽戴上頭，人就一定上頭，上頭就玉石俱焚。
講番個副校，大家睇佢，唔算好大年紀已經升到副校，七皮一個月，響考試局做委員，意氣風發，有老婆有個仔，仲有教會侍奉，本來就係中產勝利組，點知就做咗真．林耀國，搞到身敗名裂。
你話佢係咪好仆街？其實都唔係，個女仔好似已經夠稱，從佢地嘅對話睇嚟，佢好似俾個女仔舞來舞去咁。個女仔究竟係咪玩佢我地真係好難判斷，因為中學生談戀愛本來就係咁無厘頭。
呢位真．林耀國佢就好似《課長島耕作》裡面嗰啲情陷女女嘅中年男人咁，可能成世人都冇戀愛過，又或者佢已經太耐冇戀愛過，面對工作家庭壓力，已經麻木晒，點知一有少少戀愛感覺就變番個十幾歲男仔咁款。
真．林耀國最後個微信千字文，其實真係幾悲涼。睇佢講佢點樣被hurt，似乎佢真的受傷了。由始至終，個女仔要嘅嘢根本就唔係個大叔想要嘅嘢，本來大家好來好去都仲好地地，不過其實有幾可可以好地地？你估你真係林耀國個故仔咁可以無驚無險然後乜都可以重新嚟過？而家就有人認真咗，咁就出事。
我真係唔係想幫佢同個女仔講好說話，有老婆仔女搞婚外情，點都係要屌。奉獻各位三四十歲有家室嘅巴打，咁大個人，唔好出去玩真感。