（photo via cc Flickr user gonzo.pz）
原來Melody Chan就係飛行模式陳玉峰，唔怪得咁多人撐，咁一定要講多兩句關於中大CANTEEEN經營狀況比班知啲唔知啲嘅左膠同外人聽下。
如果中大CANTEEN真係如陳玉峰口中所講咁惡做，咁點解咁多年黎一直相安無事，係去到近幾年係咁頻頻執笠換承辦商？唔通以前無暑假同淡季？以前CANTEEN交通會方便過而家？講呢啲嘢嘅人根本無用過腦。有著當然就會有唔著，有淡季，就比你以「裝修」為名每年休番一段時間順便比員工放下假；無客，咪收你好平租或者免租；頹飯？而家已開始有Canteen完全唔駛賣頹飯啦，就算仲有得賣，D Canteen都可以透過限制售賣時間同日子、限制售賣數量黎控制番個成本；至於加價？當一連幾間Canteen經營者都講到明，唔到價就寧願唔開，你認為膳委仲敢唔敢冒中大學生無嘢食嘅風險，響呢方面企硬？
結果，響經濟學嘅世界，根本無乜嘢叫惡做唔惡做，人地計啱數，響度開舖就自然有錢賺，對於呢條八婆夾硬要講到經營商迂尊降貴黎中大開餐廳，學生哥有嘢食經已要千多萬謝，我只能用番左膠最like嘅一句re番佢：「買家同賣家，沒有誰比誰高尚」。
左膠成撚日提撚住嘅女工個情況其實都係一樣。陳玉峰開口埋口講撚到女工有幾偉大，又延長服務時間又有義工看舖乜乜七七，但點解呢班左膠唔掉番轉諗，女工賣啲嘢好多時都比附近貴多幾蚊都仍然有咁多人幫襯？中大嘅同學同教職員大家都心知肚明，咪又撚係因為或多或少抱住「支持弱勢」呢個心態囉！左膠討厭嘅地方就響呢度，一方面又要講到社會大眾要有理想乜乜七七，然後為咗要拗嬴人，響某啲位又撚要扮「右」，完全無視消費者其實係會將價格同質素以外嘅附加價值包含埋消費嘅選擇！
當然，我地仍然要問，點解中大Canteen近年會出現咗經營問題呢？呢樣嘢就算陳玉峰睇多十年文件都唔會解得倒，因為呢個係三改四同新書院制帶黎嘅後遺症。話說當年三改四有幾年會多咗整整一屆嘅學生，校方為咗確保到時食物唔會供應不足，就開咗好多新Canteen，甚至誘使例如Snack Bar老闆擴充營業。之但係學校根本無諗過當三年制學生畢業之後多出黎嘅供應點樣處理：突然間少咗幾千個學生，Canteen點會唔經營困難？
令情況更惡化嘅係，由於出現咗好多新書院，而唔少新書院又會各自擁有自己嘅Canteen；由於Canteen同時係等如書院自己嘅權力彰顯，所以就算唔夠客都一定唔會執，結果將學生客源拉散哂。呢種對嘅市場扭曲，自然神仙難救。
仲有，雖然學校Canteen可以透過平租甚至免租方式降低營運成本，但中大有樣好唔負責任嘅係，將所有Canteen嘅維修、翻新、消防衛生設施改建成本，全部要由Canteen經營者自己承擔，例如當年Shaw Can、眾志堂新接手果陣，剩係裝修費都係以百萬計，再加埋年年都要搞嘅各種維修，結果又變成咗另類無得壓低嘅租金成本，呢樣咪就係難捱嘅原因囉。響度真係要問番陳玉峰同佢班左膠Friend，中大飯堂作為學生福利設施，點解校方可以咁無承擔，而全部轉嫁比經營者？你班中大左膠咁多年黎，有無就呢方面成功爭取過任何進展？
最後，陳玉峰完全無視星火早已澄清譚仔貢茶Pepper Lunch全部都只係學生建議嘅事實，繼續老屈人作出「虛假承諾」呢樣嘢，我已屌都費事；但我響度真正想指出嘅係，呢位離地人士果然夠撚哂離地，幫佢班左膠Friend如楊政賢等挖咗成個坑等佢地跳落去：當你用咗成篇文走去講「小型連鎖集團」響中大根本無經營空間，咁你班左膠Friend支持嘅「小店經營」咪仲撚無可能！？而家班左膠大聲疾呼嘅係，「唔可以比大型連鎖集團一統天下」呀屌！
點解中大可以賣頹飯、價錢可以比出面平一大截，咪就係規模生產嘅代價囉，唔通一間小本經營嘅小店，可以賣倒12-15蚊嘅頹飯？其實中大而家不乏小規模經營嘅Café、小餐廳，但代價就一撚定係賣得貴過一般大型Canteen，咁你陳玉峰係咪要叫其他中大同學齊齊開啟「飛行模式」，寧願捱貴餐，都唔係連鎖集團經營？你口口聲聲叫人地「星火」要交待清楚，其實你提出咗問題又講啲唔講啲，最應該解釋清楚果個係你先啱！