美國選戰電影有唔少，近期上映嘅《選戰偽術師》搵埋「傻大姐」姍迪娜布洛（Sandra Bullock），希望可以擦出火花（或者吸引多啲觀眾買飛入場）。筆者睇完後嘅觀感係，呢齣戲講選戰嘅位同「傻大姐」啲GAG好似水溝油咁，撈來撈去撈唔埋；但呢套戲可以喺深入淺出之餘做到好好睇，其實亦好好嘢！作為一個香港人，睇完近期上映嘅《選戰偽術師》認真感觸良多。
《選戰偽術師》講述2002年玻利維亞總統選舉中，一個性格較孤僻嘅候選人喺美國請來一個「政治化妝師」Jane Bodine（姍迪娜布洛飾演）幫手。由於佢老闆民望低迷，Jane另出奇招 ，泡製一場「危機」出嚟，而Jane 就借力打力，將佢老闆包裝成為「非機會主義者」、「最有能力處理危機嘅領袖」，並且喺幾個星期內扭轉頹勢，成功當選。但齣戲最「正」嘅位其實喺選舉結果出嚟後先出現.……因為參選人成為總統後極速變臉，競選承諾跳晒票，啲曾經對佢有幻想嘅人都嬲到八彩！
所謂戲如人生，呢齣戲嘅情節，香港人真係耳熟能詳。現任香港特首梁振英過去幾年點呃香港人，大家都知，依家嘅笑話，反而係花名「689」嘅梁振英成功連任後會點呃北京，仲要係反覆咁呃北京仍懵然不知！
梁振英並非當今中國國家主席習近平嘅嫡系，咁梁振英想連任，梗係要向佢嘅「選民」（習近平）證明佢嘅存在價值。而梁振英班「政治化妝師」諗出嚟嘅橋，大致同《選戰偽術師》中Jane嘅橋大同小異。
梁振英連自己間測量師行都搞到要賣盤散水咁滯，大家都知佢能力差，冇辦法做好正經嘢；所以喺梁振英管治下，佢必然會泡製一啲「危機」出嚟。所以，「港獨」突然成為熱門話題，就一啲都唔奇：堂堂一個特區之首，梁振英竟然親自赤膊上陣，單挑香港大學學生刊物《學苑》幾個學生哥，原因就係呢幾位學生寫過文章，探討「香港是否一個民族」嘅問題（幾個細路甚至冇話佢哋支持香港獨立）。梁振英又力排眾議，唔理香港大學上上下下嘅反對，委任以作風「硬朗」見稱嘅李國章做香港大學校務委員會主席。如果真想整頓香港大學，咁最正路嘅做法梗係好低調，靜靜雞咁換晒港大班子，何需高調做呢場「大龍鳳」?講到底，梁振英就係要向習近平證明：「香港有危機，我才是可以化解危機的人。」
《選戰偽術師》講到啲政客當選後變臉跳票，香港人自然深深有代入感。如果 習近平真係保送梁振英做多一任香港特首，咁香港嘅景況將會好微妙：「港獨」支持猛升，「強力部門」點強力都壓制唔住，港人分化日益嚴重，經濟面臨危機，「太子黨」喺香港利益受損，習近平自己都會受到壓力……作為香港特首，689嘅作用本來應該係緩衝而非激化，但佢完全冇做好呢個角色，北京俾佢繼續玩，其實只係整蠱自己！
如果講笑位嘅話，呢齣戲嘅GAG同現實中嘅香港嘅政壇笑話比較，可謂係蚊脾同牛脾；姍迪娜布洛喺落飛機跣低，點夠我哋香港盧醫生跌低好笑？就算姍迪娜布洛除帽同對手飛巴士追逐一幕，都不及689當年同唐唐叮噹馬頭跑馬仔咁吸引。最重磅嘅笑話，自然係咁嘅特首都可以連任！