（photo via cc Flickr user Rob Marquardt）
等BONUS就好似王母娘娘等蟠桃熟一樣，一年對我來講，係「三千年開花，三千年結果」咁耐，我真係等到條頸長過FIONA。等到舊BONUS，一交完稅同保險，又打回原型，瞬間變窮L。
然後我識任何人都話：「我拎完BONUS就resign架啦」…
個個都想轉工，個個都話，Q1啲人開始郁，到時就會有空缺。所謂嘅空缺，唔係新增空缺，只係「我做你份工，你又做返我個份工」，玩爭櫈仔咁。我呢啲「低塵」，郁來郁去，都係由一間公司嘅「低塵」，轉去另一間公司做「低塵」。
公司睇死你轉極都係做粒塵，分俾我舊BONUS少過「綜援出雙糧」…
無論經濟好唔好，公司都同你講「下年經濟唔好」，經濟差，就共度時艱；經濟好，就積穀防飢，時刻都提醒我唔好痴心妄想。
公司賺好多，但舊BONUS就好似餵人型蜈蚣咁餵…
呀哥呀姐一定係人型蜈蚣個頭，食完痾返出來比中層，有咩衰得過我呢啲「 低塵」，等食屎都仲要食「隔夜屎」。
「想拎BONUS，吠兩聲來聽下先啦」
俾BONUS我，仲要俾說話我聽。一方面覺得我資質咁差唔值得加人工同分BONUS，另一方面我資質咁差又乜鳩高難度嘅野都俾哂我做，個year plan乜鳩都填我個名落去。食你個舊「隔夜屎」，要我好似義犬咁知恩圖報？仆街啦你。
大家有無睇張慧敏嘅職場慧眼，佢以職場達人身份，三不五時教人點喺職場取勝，得閒屌下新仔員工有幾唔識做人。
張慧敏講年輕人想升職：「升職不升職也好根本不是重點，最重要的只在於有沒有在工作中為自己累積本錢增值然後升值！」
→ 你去見工，個HR 眼中所謂嘅「員工升值」，就係睇你做左N年有無升過職。想升職，升職點會唔係重點？
公司唔加你人工，佢話：「講到底我們是為自己打拼記住一定要爭氣，公司上司搵你笨，切忌放軟手腳鬥氣hea做，應當加倍努力做到最好跳槽去！」
→ 明知搵我笨，仲繼續俾佢搵笨？如果要努力做到最好跳槽，點解唔成功跳槽後先俾心機做？
大公司請年輕人有煩惱，佢話：「高層再問我有否察覺時下年輕人很短視，只看眼前利益，對公司非常缺乏歸屬感。以前我們是先耕耘再問收穫，但現時講多無謂，不肯信任公司或上司的承諾。」
→ 係，只有老野先長視，我地永遠都短嘅。
講到應唔應該食回頭草，佢話：「很多職場中人都捉錯用神，把焦點錯放在回不回頭上，彷彿完全忘記了當日因何下定決心走。要是對工作還有留戀，有甚麼不滿應該提出來好好講，和老闆上司有商有量，不應一時之氣意氣用事，或者以退為進已離職作為要脅，逼自己埋死角沒有轉彎的餘地。」
→ 我最大嘅不滿，就係老屎忽教我同一個無得商量嘅老闆商量。
好多人鬧張慧敏呃稿費。佢唔係寫俾打工仔睇架，佢寫俾自己睇，俾高層睇，佢咪就係老屎忽representative囉。我地啲「低塵」同佢地啲高層根本立場唔同，公司覺得賜舊BONUS俾我係陰陰德；我想話，舊BONUS我應得架！
呻完又要面對現實，「又再」開始「今年Q1前一定要搵到工」嘅大計。工無一份係唔仆街嘅，只有無咁仆街，我唔想下年又做人型蜈蚣嘅隊尾呀。