我係一個畢咗業兩年嘅中大舊生，見到今年學生會兩支莊都打出本土口號，好想趁機會呻兩句。
宜家我喺某間會計師樓做（最出名嗰幾間其中一間啦……你懂的），我想講，公司一年請嘅fresh grad入面，超過一半係中國學生，有啲部門個比例甚至乎去到三分二，但係中國學生佔本科生比例邊有咁高？根本完全唔合比例地多。而家喺香港嘅大學讀書嘅中國學生，有人請就可以自動留港，僱主唔使好似以前咁幫佢哋申請visa，令啲僱主有更大嘅incentive去請佢哋。
有啲人會覺得，咁香港學生屈就啲，唔搵大公司大銀行，搵啲local啲嘅、多啲本地人做嘅公司就容易啲有offer啦，但其實都唔係咁易。因為好多中國學生為求有香港公司請佢幾年，等佢留夠七年攞香港身份證，又或者喺佢履歷有得寫有在港工作經驗，好低價錢都肯take個offer。當年我有個同系同學，本來in完最後一round幾乎有offer，臨門一腳畀個中國學生搶咗個位，因為人哋收少佢三千蚊。人哋中國學生根本唔旨在錢，只係旨在張身份證，在港嘅生活洗費有老家無限量支持。但係我同學就要喺香港生活，要畀家用父母，要畀零用錢細佬妹，樣樣都係錢，點樣陪啲中國學生頂爛市？
老老實實，讀十幾年書，咁辛苦考過公開試，入到三大，好多同學仔都係想搵間大公司做。而家畢業嘞，眼見住啲一直想做嘅職位就畀晒班中國學生，啲船又畀晒佢哋，宿又佢哋優先，人工方面又以本傷人，問心，你條氣順咩？點解喺香港土生土長嘅我哋，乜嘢都無優先權，乜嘢都要讓路畀中國學生？點解香港學生好似做二等公民咁？