臨近歲晚，好多新年活動都慢慢開始籌備當中
當然唔少得拜年、行年宵市埸，同埋…約你出街
曖昧中既男女無論過時過節、定係星期一至星期七個腦都只係得對方
而節日當然更加係一個好好既藉口去約對方出街
「你上年有無行年宵呀？」
「有呀，不過好多人囉～」
大獲！阿杰自己都估唔到第一句已經出師不利，似乎嘉欣對於行年宵無乜好感
其實佢係約對方之前已經都諗左好多藉口，以備不時之需
「我有朋友係個到開舖咪順便去睇下」
「諗住感受下新年氣氛嘛」
「可能今年有特別野買呢」
「食飽飯一齊去散下步」
但係始終都唔敢將背後既真相直接講出口，「其實我想約你單獨去街」
「都係既…不過新年去行下都應該幾好氣氛」
「你都講得岩，係有熱鬧氣氛，不過其實無乜特別野行囉」
今次阿杰真係「杰」啦，唔通新年注定一人？
「Umm不過佢年年都好似有新貨同特色野，今年我朋友都有開舖，可以順便去望下，攞番個折咁」
「haha你有野想買咩？」
「未知架，見到岩咪買囉～」
「你好想去咩？」
嘉欣留意到阿杰不斷追問自己
「都係呀..你會唔會有興趣呀..」
呢個時候佢已經括左出去，差在未直接講出黎
「因為我新年要返大陸探親戚呀，所以都未知道有冇時間」
「咁你幾時返大陸呀？」
「應該年初一」
「咁前一晚去咪得囉haha」
就係呢一句之後，嘉欣就offline左一段時間
而係短短呢十幾分鐘入面，阿杰坐唔好、食唔落
不斷係咁自言自語，就好似撞鬼上左身一樣
「係咪我太心急呢？」
「佢係咪當我狗公呀」
「點解會咁架，死啦死啦，仲唔覆我既」
當男方接近患上精神病之際，突然手機「登」一聲
「喂！你新年有咩搞呀？」
原本充滿期待既眼神變得猙獰，原來傳訊息既人係佢朋友Alex
「無呀！係屋企做廢青呀！」
何為重色輕友、男女之別，已經做左一個活生生既例子
時隔五分鐘手機再次「登」一聲，而阿杰又再次不厭其煩望一望
「haha你真係好似想去行喎」
今次終於等到對的人
「哈哈，一年一次嘛」
「咁你唔叫其他朋友陪你既？」
阿杰望住個mon..一時之間唔知點樣回應
「哦…我知啦..你搵我攝時間….」
呢個時候嘉欣再Send多句無任何emoji既訊息
冷冰冰既文字令到阿杰更加焦急
「唔係呀..」
佢呢刻手忙腳亂即刻覆都覆唔切
「只係..我想陪我行年宵既人..係你一個」
雖然隔住一個手機屏幕既距離，但嘉欣都感受到對方緊張同口窒窒既語氣，仲有…一種愛意
呢刻已經發自內心露出一個微笑
「傻人ha 你想約我出街咪直接講囉」
望到呢一句說話，阿杰就好似中左頭獎一樣咁開心
YES！
跟住一野彈起身個頭就轟落個床頂到
呢刻雖然痛到訓左係床上面「典下典下」，但面上既笑容仲係難以掩蓋
而阿媽聽到聲就行左入佢房，見到個仔好似痴左線咁係床上面笑，真係有D擔心
「haha 姐係你應承我去？好呀！因為我唔知你點諗..我怕太突然會嚇親你，但聽到你話去就好開心，就算岩岩撞到個頭都值得」
「白痴haha」
好多時我地都怕羞、怕尷尬而婆婆媽媽，面對鍾意既人都唔敢表達自己心意，又驚比人收兵、比人拒絕好柒
但其實當一個女仔比人追緊同曖昧緊既時候，已經唔會再去諗咩收唔收兵
因為佢知道有人肯花時間同心思去追求自己、迎合自己，個種感覺已經好感動、好開心
一段關係最驚既並唔係表白，表白衰左最多咪柒
但最驚既係你唔敢開口，眼白白睇住你鍾意既人一步一步遠離自己
到你真係有勇氣去追既時候，可能已經太遲…
P.S記得個年行年宵好多人，我地兩個行到好埋、好近
「哇..真係好多人呀」
「係呀，你記得跟實我呀，等陣唔見左你haha」
「又笑我矮！你行慢D咪得～」
「你咁樣咪唔會走失囉ha」
阿杰將嘉欣隻手挽著自己手臂
兩個人已經無視左周圍既行人，嘴角都不自覺露出一絲微笑
新一年，新開始
放膽追佢啦～