（photo via cc Flickr user Joshua Ommen）
基督徒，特別係經常番教會嘅基督徒
佢哋講嘢有自己嘅一套字眼同句式
我故且稱之為「耶式中文」或者「耶語」
日常生活未必會好明顯咁察覺到
但一去到認真場合講嘢
就算內容同基督教完全冇關係都好
你都會覺得佢好似祈緊禱咁
所以有啲人唔使問
一聽已經知佢係基督徒
以下我列舉幾個基督徒嘅常見套語
頭盔：我尊重所有人嘅講嘢風格
亦唔係話基督徒講嘢有咩問題
呢篇文志在引君一笑
唔使太認真，哈哈
套語一：當中
我覺得呢個係基督徒最易認嘅用詞之一
好似話「一日嘅忙碌當中」、「嚟到我哋當中」、「喺活動當中」
廣東話係比較少咁樣表達（起碼今日係）
而「當中」呢個詞亦冇咩重要意思
只係一個習慣性用語
套語二：有乜乜乜嘅時間
呢種套語同「當中」嘅經典程度可以話係不相伯仲
好似「分享」會變成「有分享嘅時間」
好似「聚會」會變成「有聚會嘅時間」
同樣係得基督徒會咁講嘢
明明意思冇唔同
但佢哋總係會加多幾隻字入去
套語三：一同
唔係打麻雀個一筒喎（我知有啲爛，SOR）
廣東話多數會講「一齊」
國語嘅話就多數講「一起」
今時今日除咗廣東歌填詞會用「一同」之外
大概就係基督徒用得最多
套語四：感恩
宗教人士好鍾意用呢個詞
台灣好多佛教徒都將「感恩」掛喺嘴邊
而香港啲話「感恩」就幾乎變咗基督徒專用
佢哋事無大小都可以「感恩」（教義嚟嘅，凡事感恩嘛）
甚至用嚟取代其他表達情感嘅詞
例如高興嘅事，佢又「感恩」
覺得好好彩，佢亦「感恩」
套語五：係乜乜乜嘅
呢種用法依家後生仔都會當口頭禪咁用
好似用「係型嘅」嚟讚人好型
但基督徒用起上嚟別有一番風味
佢哋好鍾意配合埋並列／排比法使用
令成個發言聽落更高質
例如話「係好奇妙嘅，係好感恩嘅」
最後我用一段模擬嘅開場白嚟做一個示範
首先係普通版：
「大家好，今日我哋邀請到林教授嚟同大家分享吓佢嘅心得，實在好難得同好高興。相信大家一定會學到好多嘢。」
以下係基督徒版：
「大家好，今日邀請到林教授嚟到我哋嘅當中，同大家有一個分享嘅時間，去講吓佢嘅心得。都知道呢個機會係好難得嘅，係好值得感恩嘅。讓我哋一同以謙卑嘅心去學習。」
雖然唔知林教授係乜水，會分享啲咩
但睇完呢段開場白
係咪當堂想講番句「阿門」呢