我係James，同女朋友Rachel拍左拖都有三年幾。
佢份人其實就無咩特別，充其量都可以叫港女嘅。
佢平時嗜好除左係睇下韓劇台劇大陸劇之外…
就係拎我黎同人地比較。
「人地Ivan送左Pandora比呀Fox做生日禮物呀，你睇下你，次次送啲野都唔特別嘅…」
「點解人地啲情侶成日都有講有笑，你就成個自閉仔咁架，次次出街都拎住部電話！」
類似嘅說話我諗我一日都聽好幾次。
直到最近，佢又唔知係邊度，搵左張男友愛情計分表番黎…
坐係我旁邊大大聲係度嘈…
「你都唔氹我瞓覺嘅…你睇你Fb果張點解唔係我地合照黎架？你都無幫過我吹頭！喂我問你，你記唔記得我著幾多號鞋？」
「呃…28？」
「你以為係宋朝紥腳咩？！」
似乎我記錯左腰圍個數…坦白講我就真係唔記得，事關拍左咁耐拖我地又真係無去過買鞋…
「你得18分咋，咁低架，嫁唔過呀！」佢一臉恥笑咁望住我。
「嘿嘿…」大佬18都仲唔夠咩？
吖又幾逗趣喎，於是我嬲嬲地得黎又興起，拎番個女仔版計分表同佢玩下。
「喂，BB。」
「咩呀？」佢眨曬眼望住我。
「妳覺得自己處事成唔成熟？」
「下…」
「有無亂發脾氣？有無檢查我電話？識唔識煮野食呢？」
「下…」
「上次同Ivan佢地出街，你咪當街發脾氣嘅，記唔記得？」
「下…」
「哇！BB，計落妳有11分，又幾高喎！」
「你…」我已經Feel到佢想老羞成怒…翻臉唔認人…
「不過我覺得其實妳係滿分架喎。」識時務者魏俊傑。
「下…」似乎佢已經無第二句台詞…
「嗱，妳睇下呢一項先，配合一切要求？如果妳配合一切要求，咁咪一啲都唔特別囉？」
「仲有呢項，不用你送她歸家？我不知幾想送妳番屋企呀！見多少少唔好咩？」
黎到呢度，我見到Rachel已經開始膠笑…
「妳唔Check我電話，我會懷疑妳唔緊張我架播！」
「妳唔講粗口嘅話，會唔會太離地呀，唔啱我喎…」
「仲有呢度最離譜，咩野出街AA制，身為一個男人緊係想幫條女比埋架啦，你話是唔是先？」
「所以妳滿分架，至少係我心目中，妳係滿分。」
雖然Rachel聽完之後好開心咁攬住左我…
但自從我地出現過上述對話之後…
佢開始更加唔聽我話，話想比多啲特別嘅感覺我喎…
而且仲日日要我送佢番屋企，日日Check我電話，粗口仲講多左添！
不過，我一樣係咁愛佢。
有時一個人嘅價值唔需要用一堆特定嘅條件去評定。
因為愛情，從來都係摸不清，想不通。
只要搵到一個屬於自己嘅Rachel，或者James，已經係一份最大嘅幸運。