（photo via cc Flickr user InterContinental Hong Kong）
見到林建岳借雲吞麵眨低《十年》，令我諗起有次識到位美國遊客，佢已經嚟過香港好多次。問佢點解咁鍾意香港，佢答我有兩個原因，除咗鍾意行山，就係想專程嚟食一碗雲吞麵。
佢同我講，雖然喺美國唐人街一樣食到雲吞麵，但終歸都只係「美式嘅雲吞麵」，同香港嘅根本冇辦法比較。當刻我先明白到，原來一個外地人會嚟香港旅遊，可能就係為咗一碗幾十蚊嘅雲吞麵。
又記得有次去日本旅行，我專程去咗一間當地風評幾唔錯又拎過獎嘅拉麵店。雖然喺開門前半個鐘已經到步，但前面已經排咗幾十個人，仲幾乎每位都係日本人（從樣貌同語言推斷）。
當時排我前面嘅係一位日本大叔，可能大家英文都係半湯半水，所以反而溝通得幾好。大叔話自己係呢間拉麵店嘅常客，喺得獎之前已經差唔多日日都幫襯。
問到呢間拉麵店對佢有咩吸引力，佢笑住同我講（英文）：「其實冇架。某程度上，喺得獎之後質素仲差咗少少添。唯一不變嘅係嗰份人情味，同每次客人離開嗰陣老闆中氣十足嘅一句『いてらっしゃい』（謝謝光臨）。或者味道未必係最好，但對我嚟講一定係最好嘅拉麵店。」
今日睇到林建岳呢番言論，除咗感嘆，其實多少係有點憤怒。當一個外國人會為咗一碗雲吞麵專程嚟香港；一個日本人識得欣賞日本拉麵嘅真正「味道」。我地呢到有個所謂嘅「香港人」，居然會咁樣去眨低雲吞麵。
又一香港的悲哀。