頭先同一名女性朋友食飯，講起學生妹呢個話題，佢話：「其實都唔明你地啲男人點解一邊話韓妹全部一個樣，另一邊又對學生妹打曬飛機咁，明明學生妹咪又係全部一樣。」諗諗吓又好似真係每個學生妹一樣。
無論係由中一到中六，每個學生妹呢種生物都有相同嘅特徵。衣著方面有V領冷衫，婆仔鞋；髮型方面有一式一樣嘅高辮加個厚齊或斜陰，再加兩執係耳仔旁邊吊下吊下嘅頭髮；行為方面有行路極唔舒服嘅內八腳同無論見到咩都嗌咗先嘅準備。以上所講嘅係普通學生妹嘅日常，但人類一出世就互相競爭，身為學生妹嘅佢地都逃唔過呢個命運，為咗係芸芸嘅學生妹中脫穎而出，佢地嘅打扮將會進一步升級，我稱佢地為高級學生妹。
高級學生妹有唔少特徵，例如將個兩執頭髮放係眼鏡以內、分別係初中同高中時期用嘅agnès b三用袋（一定要係側揹）同地圖袋、對婆仔鞋要買大少少令佢地行路有得踢吓踢吓、得閒無事拎個口罩扮病等等之外，但講到不得不提嘅一定係佢地如何將冷衫同紮頭髮演繹到登峰造極。
當你以為冷衫呢樣道具只可以係夏天保暖嘅時候就大錯特錯啦，係我中一嘅時候有位老師當眾捉一位女同學校裙過短，命令佢立即放長條裙，當時我就好奇，我地夏季校裙係一條連身裙，點樣可以立即放長條裙？後來個位女同學左手扯高件冷衫，右手好瀟灑咁將原本放腰帶位置嘅銀白色粗皮帶一野抽出，不帶走一片雲彩。當時我同其他男同學一樣睇到目瞪口呆，但後面另一個位女同學就細細聲講：「一早叫咗佢買幼皮帶架啦！咁咪可以用腰帶遮住扮無野囉，都唔知係都要用粗皮帶搏乜。」嗰時我先知高級學生妹智慧有幾高，又有邊個會諗到怕夏天太熱可以用冷衫去做掩飾整短條裙，又怕裙太短會凍可以著冷衫去保暖？
通常學校都只係批准學生紮馬尾或髻返學，但紮馬尾實在太普通，紮髻通常又似個村姑咁，不甘平凡嘅高級學生妹總會搵到第三種方法，同樣係紮髻，不過佢地紮嘅叫做「筆筒髻」。筆筒髻其實就係普通髻嘅蓬鬆放大版，要做到呢個效果，就要將自己嘅頭髮瘋狂倒梳之後再紮，通常佢地都會紮係最頭頂，如果只係睇佢地個頭就會變到成個雪人咁，倒梳其實係會對頭髮造成傷害，但佢地依然無畏無懼，每日帶住個筆筒髻返學，至於點解會有筆筒髻之稱呢？因為本人當年前面坐咗名高級學生妹，我就成日插幾支筆落佢個髻到，要用嗰時就係嗰度拎，所以我就叫佢做筆筒髻。（結果佢最後頂唔順轉返紮馬尾，但條馬尾依然就嚟高到去頭頂。）
諗吓諗吓，其實學生妹又真係無想像中咁吸引，仲做緊學生哥嘅我地唔會覺得隔離位有幾咁正。我諗大槪我地將中學個段無憂無慮又回不了去嘅青澀時光投射咗落學生妹度，因為我地可以係佢地身上多少搵到啲青春，所以我地先會對學生妹咁著迷，浪費咁多子孫。最後，我答咗我朋友一句：「食飯啦死老野。」