ViuTV除咗主打真人show，佢哋嘅節目主持人好多亦都係相對大台嗰班有新鮮感，亦較貼近年輕人市場。而其中我暫時覺得最好睇嘅節目，就係放喺星期一11:45播嘅《借宿一宵》，節目形式係透過女主持去香港唔同家庭寄居一晚，體驗其他香港人嘅生活。喺近年本土意識抬頭嘅香港，介紹本土香港人最地道嘅生活，本身已經討好；不過呢個節目最吸引人嘅地方，其實應該係女主持Hailey陳俞希。
邊個係Hailey？我由朋友口中得知Hailey本身係Now嘅主持，未睇《借宿一宵》之前，我只係知Hailey曾經係𡃁模，出過寫真，幾靚女咁。但喺唔覺意睇咗第一集《借宿一宵》後，我覺得佢無大台姐仔嗰種造作味道，不論談吐同舉止都比較自然，即係比較「貼地」。由於呢個節目就係要融入普通市民生活，所以女主持貼地係相當重要。
當然，我估《借宿一宵》喺製作上都會做下媒，因為真係無乜可能無協議下，有人會畀你住佢間屋仲要拍埋上電視。不過有無做媒其實對節目觀看性影響都不大，因為睇Hailey同屋主一家人互動先係最有趣。節目每一集，Hailey都會落手落腳幫屋主做下嘢，例如喺蒲台島，佢要幫士多東主搬貨呀擔水咁。雖然Hailey係一介女流，但睇佢應該有做開運動，所以擔擔抬抬佢都十分落力，無乜姐手姐腳。可能就係呢種落力，係大台比較少見。大台好多類似節目，已經變得十分工廠式，主持人好似只係背稿，少見會投入節目之中。所以喺呢個對比下，更覺得Hailey嘅投入係幾值得稱讚。
而Hailey另一樣幾吸引人之處，就係佢靚又話唔算太靚，不過佢都算係幾可愛。喺尋晚佢去印度演員屋企住嘅一集，佢喺照顧人哋個B女然係幾雞手鴨腳，但同BB玩嗰陣係幾有新抱仔feel，幾母性。好過大台嗰啲女主持喺呢啲節目時，通常都係掛住搔首弄姿。
如果節目有第二個season，攝製隊可以聯絡我，我好樂意借個床位畀Hailey瞓一晚，體驗廢青生活。