（photo via cc Flickr user Alan Antiporda）
「點解啲男人咁小氣。」Winke嬲爆爆咁望住部電話
Winkie算係我朋友，講靚佢唔算係靚，不過身材瘦瘦又唔算太港女，無乜壞習慣所以都有唔少追求者。
每隔一兩個星期，我地都會約埋班朋友一齊去尖咀飲兩杯吹下水。
「呀吹，你話啦，溝唔到姐，唔使斷聯絡姐下嘛」
我立即笑咗出黎。
「喂呀姐，你唔係不嬲好鄙視啲收兵港女架咩？」
「那！我無話要求過佢做乜野架，而且食親飯，出街我都要求係ＡＡ，不過佢真係唔會係做男朋友個種囉」
老老實實Winkie呢種行為，係現今香港女仔都算係合格架啦，不過可惜佢唔明，男朋友同朋友，唔係進階或退階，而係兩件完全唔同嘅事。
「呀姐，人地黎見CEO，做唔到，你又想人做住茶水先，合理咩？」
Winkie又一副「你up乜撚野？」嘅樣，救命。
CEO就得一個，人地拎哂證書著哂西裝入黎，再用英文介紹自己，你唔請唔緊要，咪同佢講囉。
你又要扮哂好心咁同人講
「你個學歷同經驗都唔係好岩，不過我地茶水部都仲有位，不如你做住先丫？」
「喂！我絕對無諗過收兵呀！」對自己形象好著緊，因為佢好怕自己成為港女。我叫佢冷靜，聽埋我講。
「但人地唔會咁諗架嘛，講真你有見過茶水升做CEO咩？不過CEO多數都要做埋茶水個份，最重要，佢份糧係CEO份『糧』丫嘛。咁你叫做茶水，好難怪會令人難受而唔再搵你架啵。」
「我覺得你呢個比喻好差，唔得！再講過」奸奸地笑咗一下Winkie又扮嬲，女人真係麻鳩煩。
「呢個唔岩聽，講個第二個。好簡單，反轉黎講，你只係想同佢做朋友，但佢淨係想同你上床，你係咪開始疏離佢先。」
「妖！」Winkie又開始閪面，我明，因為佢知道點解成日都唔夠我講。
不過無用丫，唔止女人，好多男人都係咁，總覺得朋友進階就係男女朋友。
但唔係無，任何人開始都係朋友黎架啦，但呢個情況已經唔太適用，特別係香港地依家咩都要快，同你講話要溝佢２年都先肯受溝，你自己都淆底啦，最重要依家好多人怕做兵仲多過怕食檸檬。
食檸檬簡單快捷，做兵痛苦漫長。
其實大家會唔會一齊做男女朋友，好多時一開始就已經決定咗。
至少我係咁諗。