（photo via cc Flickr user Edwin Lee）
話說小弟都曾經做過kfc啦（做過收銀、出品、清潔），又做過葵廣賣書仔啦，都見過唔少客人，想講一樣野：香港服務業唔易做。
搵工之前，不妨問下自己為乜要去返工，為錢？為攞經驗？定係為左識人，為左玩？
如果係為左錢既，冇乜建議俾你，人工高就去做啦，不過預左要有d卑恭屈膝，做奴隸咁既感覺，或者要有好好既服務態度。
如果係為攞經驗既，不妨諗下做d skillful既工作，未必話一定係包裝、製造、廚房果類先叫做學到野，有時可能派傳單、做收銀、sales都可以學到唔少野，例如睇人眉頭眼額或者待人接物既skill，其實都有d用。
如果係為左識人去social，或者抱住玩玩下既心態的話，真心講，不如算數啦，依家唔係返學上暑期班，冇乜人會再事事遷就/容忍你，冇人會因為你係「90後」而原諒你，要記住社會係殘酷既，唔可以再成日玩玩下。
另外想講下有d工種/公司唔recommend去做，例如快餐店、大型零售店，好似m記、kfc、百佳、萬寧果d，唔係辛苦，而係你份人工同勞動力唔成比例，賺埋賺埋都係俾返果堆商家，反而不妨考慮下做一d舖頭仔，壓力冇咁大而又學到野，其實幾好。
最後，希望大家走入社會之前，諗清楚自己係為乜，同埋記住自己已經唔再係學生，冇人會再遷就你。
維他奶煲雞翼