（photo via cc Flickr user Mark Wyman）
早前，有位網友發表咗以下呢句說話，我深表認同，所以都share咗：
點知，又有位仁兄話：「不必讚揚工業革命添，唔好混為一談啦。」呢個真係大哉問（雖然我即時block咗佢），原來有人真係認為，共產主義同中共係工業革命嘅產物嚟。佢鳩又鳩唔晒，但又唔算啱，不過我認為呢個問題都幾值得講下嘅：到底工業革命同共產主義有咩關係？
誠然，冇工業革命，係唔會有共產主義嘅；但冇工業革命都會有自由主義、民主體制、保守主義，由呢個角度睇，工業革命產生共產主義，又好似係啱喎。
但係，問題係，呢啲理念同體制，話就話係工業革命之前就有，要真正廣泛傳揚、運作，都係要到工業革命之後先開始。就以英國為例，1771年，打比郡出現第一座水力棉紡廠，工廠制度出現，即可以視為工廠工人開始出現。1781年占士·屈（James Watt）改良蒸汽機，令蒸汽機走出礦場、工廠進入城市。呢個時代，英國當然已經有民選嘅國會，但有權投票嘅人都係鄉紳地主為主。因為工業革命出現新興工業城市，1825年出現集體談判權，再促成1832年英國嘅政治改革，國家權力開始轉向城市，同時下議院權力開始大增。
工業持續發展，工人人口亦不斷增加，同時亦意識到1832年改革只係惠及中產階級。1838年，英國工人就開始爭取普選，成為英國民主改革嘅一大動力 （雖然早期會因為落雨而冇人嚟遊行……）。1858年成功爭取議員財產限制（當然係下限，即係1858年前冇錢人係唔可以選議員），直至1867年，打比伯爵政治再次改革，城市內有樓人士以及每年交10鎊租嘅人都有投票權，農村限制就嚴格啲，要有生產力。1884年又將10鎊租之法擴展至農村。至於英國嘅普選，就要等到1918年，當第一次世界大戰結束，屋企窮嘅軍人發現自己為國打完仗之後係冇票投嘅，女人又發現自己為國支撐工業多年原來國家從來冇考慮過女人要有得投票嘅，先促成英國年21以上男性普選，而女性年30以上普選。
英國國會下議院由14世紀開始就存在，當時英法百年戰爭先啱啱開戰，聖女貞德都仲未出世。但係要直到500年後先開始有正正經經嘅民主改革，令下議院真正代表民意，如果唔係因為工業革命，睇怕都幾難開始。因為要到咗有工業革命嘅年代，先會令平民大眾聚集喺城市、先會有工會、先會有工人運動、先會有集體談判權、先會有人爭取政治改革……
當然，另一方面呢，又係因為工業革命，先有人開始建構共產主義嘅。如果撇除馬克思受黑格爾思想嘅影響，社會主義同共產主義嘅理論多少都要由馬克思身處嚮工業革命時代，先會由觀察工人生活而產生「資本家剝削無產者剩餘價值」呢個理論。但係，你話工業革命同共產主義嘅關係，係唔係好似五四運動同中國共產黨嘅關係一樣，就一定唔係。
工業革命係生產方式突破，令社會開始變革，從而產生工人階級，繼而帶動政治改革同唔同嘅政治思潮，共產主義只係工業革命間接帶嚟嘅其中一種政治理論，而且仲唔多主流：馬克思認為1848年革命係共產主義來臨嘅時機，寫埋《共產黨宣言》號召革命，結果有冇人睬佢？又真係有，但又真係好少數。
對比起嚟，五四運動以救國為號召，引嚟全盤西化嘅呼聲，直接促成中國共產黨成立。漠視人性、仇視傳統嘅極左思潮，正好暗合所謂嘅「五四精神」：表面上係「民主、科學、救中國」，實際上根本就係「中國咁弱不如唔好做中國」；中國共產黨，亦都好切實咁執行「消滅中國」呢個創黨初衷，仲發動文化大革命將五四運動未打完嘅下半場打埋佢。
所以話，用工業革命同共產主義嘅關係，類比五四運動同中國共產黨嘅關係，係何其咁鳩呢？
至於工業革命同共產主義有咩關係？都係不如問：工業革命同民主政制有咩關係好過啦。
後記一句：btw英國工黨好似又大敗喎，睇嚟工運同左翼呢套招牌都行將就木……