尋晚ViuTV 嗰場《G-1格鬥會》，Margiela Kwok Vs 八婆Hazel Tong，本應係觀眾最期待嘅一場，但係由前晚嗰集就已經覺得唔對路。先唔講Margiela 同Winkie 嘅比賽，兩個攬咗有幾耐，啲拳有幾揸流攤。再唔講再之前嗰集阿Margie 你點同Vangie 響Winkie 背後笑佢練習兀高腳，打完比賽又扮晒Friend 子錫面仔。Rika 對Winkie，又話尊重對手先要出力打，咁今場已經唔叫你尊重對手喇，尊重吓自己啦阿Margie，你喊夠未呢？唔係唔比你喊，點解要打到一半喊呢？你唔想打其實可以唔打㗎，投降退出比Winkie 贏囉冇人會怪你，反正啲人都想睇Winkie 對Hazel 多啲。不過講開又講，Winkie 臨尾聽到教練教佢點樣Take Down Margie，明明輸到一仆一碌，但佢又真係努力去做，我覺得呢種態度係可敬，順手Salute 一下。（雖然我覺得佢收晒啲狠勁係因為怕九咗Hazel…）
係喇，講到喊就可以入正題。其實每次見到Margie 喊，我就好驚佢副大眼仔跌出嚟。佢第一次同Hazel 打嘅時候，兜副大眼仔跌咗落Hazel 塊面度，直頭爭啲跌入Hazel 隻眼度…除咗想嘔，到後來輸咗講感受嗰對大細眼，我直頭係笑到拍席投降。換返副透明隱形眼鏡打啦，上到台仲做大眼仔，一來我覺得好唔尊重個擂台，因為美貌並唔係一個武者需要嘅特質；二來我份人就好乜科學嘅，大眼仔比一般透明隱形眼鏡透氣度低，另外鏡片面積比較大，打起比賽嚟講係比較危險，仲要容易受感染，打比賽呢啲血汗橫飛之地，都唔叫你尊重個擂台喇，尊重自己啦。
尋日同Hazel 打之前，又喊。由前晚嗰集開始就不停話自己點樣受傷，嗱我唔信你同Winkie 打會有機會受傷到，因為你兩個似按摩多過打囉。你睇吓Hazel 同Vangie，兩個都係好朋友，但打起上嚟真係技術盡出，Hazel 低撐嗰一腳，下爬都走位呀真係。咁唔係比賽傷就一定係練習傷，咁其實每個人都有傷㗎啦，唔通我Spar 到傷晒我又四圍講咩？再者，你真係覺得自己傷到打唔到咪好似Vangie 咁退賽囉，喊係冇用㗎。呢個位我就戥Hazel 唔抵喇，啲人係咁鬧佢堅持要如期舉行打唔理其他人嘅傷患。我明佢係乞人憎，但係「如期」點會係錯？人哋一早有晒其他Working Schedule 唔通又係錯？佢哋唔係專業打女，佢哋係藝員嚟，即係憎一個人都憎得有Point 丫。另外，相信大家比仇恨遮蓋咗眼睛，係製作單位自己都需要二月尾前完成，點解矛盾要淨係指向Hazel？
如果大家真係有心睇，其實上集Hazel 同Vangie 對打，佢都帶傷上陣。點解呢啲位就唔識欣賞人？人哋足足打咗五Round，係五Round。台上三分鐘看似輕鬆，但對女生嚟講係需要好多嘅力氣，何況五局？佢同Vangie 咁樣打完，Vangie 一招大石責死蟹喎，乜蟹都死啦，可以冇傷咩？佢冇時時刻刻擺喺口邊啫。Margie 有傷，Hazel 都有傷，咁即係公平條件下比賽啦。先唔講Margie 捱唔到兩Round，佢投降之後，啲傻西瓜就話Hazel 贏得唔光彩。咁Margie 對Mimi 嗰場使出嘅『斷頭台』呢？係咪Mimi 要比佢斷頸先叫贏得光彩？打比賽就係要攞分、技術性擊倒，或者令對手投降去贏。我亦見到不乏有人話Hazel 勝之不武，因為佢教練叫佢攻人哋隻手…First of All，呢啲叫做戰術；Second Fucking Point 係，你話攻就攻咩？一係對方好白痴成隻手交比你鎖，一係就Hazel 真係好能勁（不過以佢學習嘅進度，其實佢真係算勁），我教練叫我踢多啲對手我都未必做到，何況係睇住人哋隻手嚟攻？
Hazel 冇打黑幕，我覺得已經好光彩。點解咁講？Margie 立技唔得、寢技更加係冇，衰到Hazel 唔大聲嗌『扯頭髮呀！』，個裁判唔出聲、Margie 唔放手，連做Top Mount 都比Hazel 半防守到；而個勢咁嚴峻，Hazel 做到Triangle、Armbar 幾次，第二Round 甚至用Armbar 迫到Margie Tap，只係Margie Tap 慢咗就完場，都竟然係Margie 高分啲…哦，因為佢係FFG 董事杜恆霖先生Train 出嚟嘅，而FFG 又贊助《G-1格鬥會》喎…我突然明白了很多。
FFG 一貫以往作風：呃弱智，但估唔到佢當觀眾都係弱智啫…