（photo via cc Flickr user Derek Gavey）
荒謬情況已經失控。
病人：醫師，我唔食得中藥呀，有咩辦法？
醫師：請解釋。
病人：我食緊薄血丸，醫生話唔食得中藥，會撞。
醫師：咩叫中藥？
拿，唔好俾我估中會用『𠴱三個字開頭』！結果都係估中…
病人：『唔知呀』…佢話杞子都唔得、淮山都唔得，咩丹參當歸嗰啲就梗係唔得啦係咪？
醫師：啊…咁薯仔得唔得？
病人：薯仔咁普通，冇理由唔得掛？
醫師：咁一條條新鮮嗰啲牛蒡得唔得？
病人：咁我唔知喎…
醫師：請問淮山同牛蒡同薯仔有幾大分別？杞子同食粒車厘茄乾又有咩分別？會唔會全部都唔食得？
病人：err…
醫師：你醫生有冇同你講深綠色蔬菜都唔食得呀？
病人：有呀有呀！佢話菠菜同芥蘭嗰啲都唔得呀。
醫師：嗯，係呀，咁你知道覺得點？
病人：咁梗係麻煩啦，咩都唔食得咁，好似好危險。
醫師：食藥食到咁多野擔心，點解要食？
病人：咁我驚中風丫嘛，佢話我高危！
醫師：啊！即係食黎係醫你『驚中風』呢個情緒啦。
病人：err…
醫師：咁而家係咪驚少左？
病人：咁有藥食係安心左啲…
醫師：邊有？你驚中風驚少左，驚食錯呢樣同驚食錯嗰樣，咪又驚返多左？
病人：err…
醫師：拿我講出黎大家自己研究下，佢係咪話你知丹參嗰啲中藥活血，食左薄血丸再活血，會好容易出血呀？
病人：係喎！佢真係有講。
醫師：即係佢覺得丹參同薄血丸功效有重疊啦。
病人：係係…
醫師：咁食丹參唔使戒菠菜同芥蘭、唔會唔食得中藥、唔飲得湯、唔做得正常人。
病人：咁即係…
醫師：點解唔係『薄血丸』好危險，而係深綠色蔬菜好危險？
病人：err…
醫師：嘻嘻，大家研究下啫，你想食咩藥唔食咩藥、想食咩菜唔食咩菜，你有自由喎，我將我識嘅話左你知，然後點做你自己揀。
病人：咁…？
醫師：咁即係而家你咩事先？
病人：我想睇下有冇咩方法可以調理好啲唔會中風囉。
醫師：哈！食薄血丸咪得囉！
後來，我教佢練功、飲食原則、修心養性，冇開藥、冇針灸，叫佢自己諗清楚，究竟有冇必要為左『預防』一個病睇醫生食藥。
唔明？咁你答我一條問題：請問預防疾病同建立健康之間有幾多相同部分、有幾多不同部分？
本來應該係屬於建立健康嘅部份，因為人性的懶散、不負責任，包括思考生命的責任，加上藥商無所不用其極滲透每個角落搵錢的驚人意志，就俾各式各樣的『醫藥』，染指健康的部分。
即係一間污糟嘅屋，用下各種清潔劑去清潔，都無可厚非，愛天然嘅咪小梳打檸檬汁同醋囉。但我間屋唔係污糟，只係想執好啲位擺得舒服啲，本來只係作為屋主嘅自己去俾心機執下位就得，你同我講要派隊清潔隊黎同我由頭到尾落臭粉洗一次？會唔會搞錯左？
講返個病人，錢當然照收，傻豬，呢個過程比開幾多藥都有意思。
有時大家會等得耐啲，方丈都好唔好意思，但，總有一日需要對話多過開藥的可能就係你，今夕…他朝…包涵下啦…