（編按：示意圖片，絕非文章主角～）
有供就有求，呢個就係Player仍然可以橫行無忌既原因。
Player分兩種：一種係話比全世界聽佢係Player；一種係傷到你體無原膚之後你先發現原來佢係Player。
多數佢地個樣都唔算太差（如果生得柒重周圍講自己有好多女朋友都得啖笑啦），把口好識氹女仔，會做好多野博取對方既歡心，務求令你中意佢之後就任務完成。而且更多既係無固定目標，採取漁翁撒網願者上釣式既方針溝女，例如同一時間可以同十幾人flirt。而基本上啲女係會自己衝埋去，佢地亦都係狗公，見到岩就會衝，唔上釣會即閃，總之係講求速度—快。
唔知點解，佢地好多都好自大，成日覺得有一副食硬你咁既樣，我聽過好多男仔講過「我溝硬你呀／我食硬你」，我心諗你乜水呀？每次我一見到呢啲人，我真係年夜飯都嘔埋出黎呀。
本人有個姊妹，因為只係比Player「關心」左幾日，就即刻沉船。
結果人地當然即刻無睬過佢，避都避唔切添，但我朋友就成個傻仔咁中意左佢成年。
其實佢地會做既野都不外乎係關心下你食左飯未，扮下兵仔，格硬同你有懶親密既身體接觸咁，但同兵仔最大既分別係控制權係佢地度，只要你一沉船，就好似幫佢地過關升lv儲經驗咁，佢地就會同你拜拜。
至於果啲隱藏Player，有時真係防不勝防，例如表面係正人君子，重來唔會公開女朋友呀；唯一可以做既係發現左既時候要及早抽身，但最可悲既係，對著Playerk有啲人仍然會中個頭落去。
好多人發現左對方係Player之後，總會覺得「可能佢會改過」「都中意左啦冇辦法」「但係真係好中意佢」「我甘願做兵呀」，結果就由得自己瘋狂沉船，咁樣除左係好傷身之外，重縱容左佢地。
我好想係度奉勸各位沉緊船既巴絲打講聲，你唔係果個Player圈，就唔係果個圈架啦，勿再沉船，及早上岸，重新做人啦。