提起寶礦力，都算係一種幾神奇既飲料。
當然佢既能量價值（即係運動過後迅速補充身體水份同電解質）一早已經深入民心，但係果種澀澀地既西柚味，話甜又算好甜，話酸又未算好酸，有一類人就覺得好好飲，但同時又有一堆人覺得超憎，打死都唔會走去飲，有Ｄ似依家既何韻詩。當然，係我地大學讀書時期，寶礦力都唔係人人飲得起，因為佢多數係汽水機入面係最貴果款，係仲未有八達通既時代，呢個價錢，係會令到相當多人卻步，寧願飲道地綠茶算數。
提起寶礦力，就會好容易諗起夏日，藍天白雲，然後最好就係，燃燒自己既青春，談一場轟轟烈烈既戀愛。點解？因為八九十年代果陣，日本經濟泡沫未爆破，流行文化席捲整個亞洲果陣，寶礦力既廣告有唔少都相當之深入民心。至少我到依家好多都仲有深刻印象。來自東洋既美少女，好健康活潑咁係太陽之下揮灑汗水，然後再配個好聽既背景音樂，飲番啖寶礦力，再係鏡頭面前，自然流露，展現滿足甜美既笑容，足以令果陣不少宅男毒男完全心醉。
我印象記得好多左出名既女星都曾經幫寶礦力拍過廣告，例如：後藤理沙、深田恭子、鈴木杏、綾瀨遙……有邊個唔係後來都獨當一面先？至於數起果陣最鍾意既廣告歌，當然係要講泉水姐ZARD作既幾首膾炙人口之作啦。心を開いて、揺れる想い，就算我依家都仲有間唔中開黎聽下，作為已經係中年老翁既回憶……美好既時光，往往都係一去而不復返既。數番起，泉水姐都已經走左接近十年……
諗諗下，人有時老左，甚至失去買一支寶礦力既勇氣（其實只係欠缺運動既藉口）。佢彷彿係完全屬於年少輕狂既一代。而依家個名其實已經叫「寶礦力水特」，就算味道一樣，始終都已經有些少野係唔同左……