【歐國杯2016】廿一世紀最弱意大利？

意大利最後大軍名單出爐後，香港祖雲達斯球迷會facebook page就搞左個投票post，題目係「件10號，係你會邊個？」拿玻里嘅恩薛尼、羅馬嘅艾沙拉維、費倫天拿嘅貝拿迪斯治、拉素嘅簡達華，甚至龍門保方都係候選名單，而且都有人揀。總之，anyone but not motta!但我相信球迷都唔係要針對莫達，畢竟件衫都唔會係佢自己話要著。但係，都唔好講咁遠嘅巴治奧，迪比亞路，就算近兩屆10號嘅卡斯辛奴，都起碼見得人，又點諗到係佢著至得。

干地揀嘅最終名單爭議之大，換黎「廿一世紀最弱意大利」之稱－無大牌、無星味、無攻力，老人問題（平均年紀28歲又10個月，史上第二老）。而佢自己係接受BBC訪問都講，今屆嘅意大利係以「outsider」定位，即係爭冠行列之外，亦指出意大利唔係冇有能力嘅年青球員，只係都太嫩口，冇咩國際賽經驗。公平啲講，意大利係有啲唔好彩。第一，干地口中「意大利最好年青球員」嘅華拉堤同「馬神」馬治斯奧一齊踢唔到，兩年黎為左接班派路而做嘅準備完全無用，中場要重新配置。第二，只係兩年時間，又有邊個諗到巴神由天之驕子，變成地底泥，自由落體速度快得令人傷感，變相前鋒又少左個選擇。

究竟干地呢廿三人大軍有咩問題呢，先同10年前06世界杯冠軍個陣容睇下，其實當年納比都只係選左五個80後，而今年干地係廿三人裡面就選左七個90後，仲有兩，三個其實係88，89年。但如果兩個陣容拼埋，好明顯16一代就被比下去，尤其是前鋒人選。迪比亞路、基拿甸奴、東尼、伊亞昆達，恩沙基，大概都足以今屆擔正。意甲球隊同英超球隊一樣，班霸基本上都唔用本土前鋒，搞到柏利著9號就大家都明喇。另一樣睇到嘅，當年AC米蘭同祖雲達斯都有五人入選；而今年，米蘭市雙雄夾埋都係出兩個，意甲班霸實力下滑嘅後果已經嚴重影響國家隊。唔使用心查證，驟眼睇當年名單，有起碼一半球員之前就踢過歐聯決賽；而今年，除左祖雲達斯一班球員之外，近三季年年都有歐聯踢未必有幾個。

睇多一樣數字，2015年嘅U21歐青賽分組賽，意大利對英格蘭。上年兩隊嘅陣容，今年有份入選英格蘭嘅有兩個（如果唔畢特拿斷腳應該係有三個）；而意大利，只有一個，貝拿迪斯治……再睇返今年嘅三十人名單，其實上年有份打歐青賽嘅人，係有四個，仲未計好多人登佢地連影都無唔抵嘅羅馬洛尼同比拉迪。即係，最後關頭，干地都係係老嘢同後生中揀左老嘢，其實唔係冇得揀，只係唔揀啫。

點兵之後嘅兩場熱身賽，意大利表現出嘅優缺點相當明顯。干地招牌3-5-2同4-3-3攻守變換，意大利後場有好強嘅控球能力，而且後防有祖記「四大天王」，可以講得上歐洲頂級。但問題係，控球率轉變唔到成為入球，進攻硬係好似差啲差啲，埋門真係要馬騮遮眼，危急關頭究竟有邊個可以挺身而出，係一個好大嘅問題。好彩嘅係，今年起碼打返起左艾沙拉維同恩薛尼，當柏利同恩莫比利呢啲中鋒搞唔掂，都有第二招變下。

最老套個句都要講，打大賽，又有邊個夠膽睇少意大利。

【歐國杯2016】