相信大家除咗長輩圖之外，最經常收到嘅就係呢類msg…
「幫手入去條link度撳個Like，撐我個仔！比賽嚟㗎！」（馬騮遮眼x3）
通常呢類msg，都會出現喺同事Group當中。尤其係嗰班啱啱放完產假嘅媽媽級同事。佢哋會經常不經意咁畀你睇佢個BB幅相，加句「佢好鬼衰㗎！而家學人噴口水喎！」「佢好百厭㗎，而家識奸笑～」
佢哋由衷覺得，自己個愛情結晶係全宇宙最得意嘅生命體，亦以為所有人都想睇佢個仔啲相…喂！訓覺啫，又唔係識出魔法，有咩好睇呢？
但，父母梗係覺得自己個仔得意㗎啦，呢樣我諒解嘅，不過…唔好叫我投票吖大佬！嗰啲乜鬼『最得意BB攝影大賽』你估真係鬥得意咩？！咪又係鬥朋友多、親戚多、同事多…
我試過最誇張嘅一次，係老闆叫晒全公司員工入房，叫大家拎個電話出嚟投票，仲起勢問大家係咪好得意，大家都異口同聲話「蝦蝦蝦係喎好趣緻啊！」
然後老闆又問大家：「你哋覺得似我定我老婆？」
喂！點答啊大佬！你個仔連隻眼都未擘得大，點知似邊個啫！
但一班擦鞋同事，個個好似蘇民峰咁，將佢個仔五官逐個拆開嚟分析，左耳似老豆！右眼睫毛就同阿媽一模一樣！
當老闆巡視大家有冇乖乖哋投票時，其中一位媽媽級同事塊面黑過包青天，原來佢個仔都有參加呢個比賽，道高一尺老闆高一丈，個同事今舖正宗含淚投票。
當老闆行到過嚟時，我好奇問：「贏咗比賽有咩獎品？」
「哦！贏咗會送罐印咗我個仔幅相嘅奶粉㗎！」
我當堂畀佢吹漲！
「藍橙，你做乜仲唔投？投啦！投啊！聽講你有個page寫嘢㗎喎，不如你share出去叫你啲讀者一齊投啦！」
大佬啊，你唔好咁痴線啦！我擺自己幅相上去叫讀者投啊！都唔會叫人投你幅相啦！我女朋友夠成日叫我BB啦！咁我都參加得比賽啦！
但為咗唔好落佢面，我只能夠講：「哈哈，老闆你真係識講笑…咁樣咪全世界都知你犯規囉～」
「哈哈，又係喎，不過個個都係咁玩㗎啦，唔通真係公平競爭咩！」
其實老闆又講得幾啱…
一個簡單嘅Facebook比賽，無篩選，任何人都有權投票，係一個好簡單嘅普選。但根本就無人尊重比賽規則，周圍逼啲親朋戚友，同事同學投佢一票…
呢種做法，就同將阿公阿婆一車車咁送入投票站，用掌心雷投票無分別。
候選BB得唔得意，根本同個比賽嘅結果係無關，就算擺隻狗上去，都有機會贏。
更好笑嘅係，舉辦呢個比賽嘅主辦單位，亦唔會睇個BB係咪真係咁得意，值得擁有咁多票，總之你最多票，你咪贏囉，我唔理咁多㗎啦！公平？咩嚟？食得㗎？
無人專重比賽規則，無人Care個結果…唉～個個都犯規㗎啦，爭取公平競爭做乜吖！
若果全香港嘅人都心水清，識諗又識揀，清楚自己手上一票係擁有改變局面嘅力量…就唔會搞成今日咁，贏嘅全部唔係豬就係狗，係一個真正得意，討人喜愛嘅BB啦！
最新出版：《港產童話》《如何激嬲女朋友而不失霸氣》