女人既性格，最俗可以分「蠢」、「鳩」、「閪」三種，成個三角咁。絕大部分女人都會有其中一種，蠢既單純啲易呃啲，鳩既好笑啲大家又開心，閪啲最多性格直啲講嘢倔啲，其實真係無問題，個人style黎添。中兩樣都無乜大問題，蠢鳩既，比大家笑下做下開心果；蠢閪既，最多係直腸直肚唔使估佢諗乜；鳩閪既，多數幾聰明，知幾時收幾時放。
但係呢，如果女人中哂蠢鳩閪三樣，成件事就無得救；不如咁講，女人中哂呢三樣既機率係難過人類單性繁殖。當女人中哂呢三樣既時候，所謂看似既「單純、幽默、率直」就會即刻變成「無知、被人恥笑、講嘢唔經大腦」，成件事係好恐怖，可以想像到呢個係有幾咁張揚淺薄既存在。真心覺得女人如果去到呢個地步，其實係會討厭到令人憐憫。引以為鑑。
呢個trilemma 既三角關係係我喺西藏由拉薩坐到去日喀則，再由日喀則坐去珠峰，再由珠峰坐返去日喀則幾近24小時既車程入面一直對住隔離位、同一個女人研發出黎。比我撞到呢個集百家之大成既女人真係仲珍奇過撞到北極光：
1. 西藏山路崎嶇，好易出意外炒車跌落懸崖，所以車必須限時限速，姐係行快左要停喺原地補時、之後要慢慢開，直至達到要求，係一個幾on9但必要既policy。知左個policy後，個女人仲不斷大叫「怎麼開這麼慢！像拖拉機似的！司機怎麼搞的！」/「又要等呀！」
2. 入西藏景區規定嚴格，基本上每過一個邊防站就要落車比身份証檢查。於是每停一次檢查站，個女人就會抱怨一次：「怎麼又要下車檢查！麻煩死了！」/「還要查！」/「來西藏一次真麻煩！」/「我們是良民哪，怎麼老要檢查！甚麼玩意！」諸如此類。
3. 風景秀美係意料之中，一路車路聽住個女人不斷高聲叫嚷「好美呀！快拍快拍！」去到寺廟又係「快幫我拍！不拍來不及了！」一路上望住佢影左至少幾百張一模一樣既相；佢掛住影相可以影到連佢自己個女都漏底左，嚇到個女喺寺廟到哀嚎「媽媽⋯⋯媽媽⋯⋯」最奇葩既係，去完個寺之後，佢問「剛剛那個是什麼寺？」
4. 行經珠峰條路既時候，見到唔少藏民屋企，最經典係見住個女人一路叫住「快拍快拍好美好美」一路嫌棄「這裡怎麼住，好恐怖，那些人真窮真髒，小孩真黑，咦呀」
5. 尋晚訓珠峰大本營，坦白講住宿環境一定只可以將就，好難令人滿意。仲記得一朝訓醒，大家都話訓到（因為好凍），佢就話「不行！真的不行！昨晚完全睡不了！全身癢得不行！被子毛墊太髒了！有蟲！這裡真的太落後了！」
6. 回程既時候經過一個無乜修葺既寺廟，門票既收費係100蚊（註：西藏既景區收費偏貴，其實好大部分都係用落維修），呢個時候又聽到佢話「就這麼一個破廟也要100塊！什麼也沒有！」但其實嗰個係保佑珠峰既寺廟⋯⋯
可能睇到呢道大家會諗其實我怨氣太大，可以寬容啲。但如上述，我已經同呢個女人毗鄰為伴加埋行左幾百公里；而且如果佢只係中上面六樣既其中一樣，坦白講無視左佢就得，但重點係以上六樣同時發生喺我隔離，成件事就會好令人躁狂同鬱悶。
我好記得我有一段時間坐佢隔離我係覺得辛苦，嗰種辛苦係同喺海拔4800米既山上急行一樣缺氧。我淨係知有好多刻，我好想好似盧海鵬唔知邊套戲揸住支迫擊砲定AK47亂槍掃射：「去死啦！！！冚家剷！！！」但我無咁做，其實我已經好仁慈⋯⋯但有無人明其實我成程車有幾壓抑？
【認真mode】西藏絕對唔係玩樂享受既地方，正所謂「眼睛的天堂，身體的地獄」。去一次西藏好多嘢可以刷新下限，例如無門無水沖但要比兩蚊既屎塔，去納木措珠峰係可以因為個屎塔而忍到成肚屎。簡單啲，姐係捱世界。
去西藏，甚至去旅行，坦白講都係各取所需，有人為左洗滌心靈，有人為左增廣見聞，有人為左為美麗留剪影⋯⋯其實各式其適，無人可以為旅行既意義定高低判對錯。不過最難頂既係，一方面享受呢個地方帶比你既觸動震撼，一方面就以高高在上既姿態對唔同既文化予以輕夷鄙視，咁無異於葉公好龍，亦突顯自己無知膚淺。只可以講，以呢種心態去旅行既人去邊到都係一樣，除左同人講「我去過XXX」同拎啲影得一模一樣既相炫耀之外，基本上只會落得一片空白。而且呢種人都唔適合去旅行，因為缺少尊重。旅客謂之「客」，正正係作客他鄉，唔求以敬畏膜拜之心看待他人文化，但至少基本尊敬自重都不可缺少。