我叫羅迅，今年廿一歲，Freshgrad，最近搵到人生第一份Full Time。
呢份唔係我第一份見既工。頭四份工，我都炒左。有一間公司既HR望左陣我份Transcript同履歷，然後望一望我，同我講：「你可以返去架喇。」
我問佢可唔可以畀個機會我in左先，佢話：「晒氣啦，你睇下你，得個三大Second up，仲要有一兩科D過，肯定係掛住玩唔讀書啦。我地公司需要既係Freshness、inspiration，passion。即係我唔係眼角高囉，我地只係要既係一個First Hon、上過莊做過幾個intern，做過三四年野有經驗既Freshgrad之嘛。你白紙一張，點幫我地手？我地唔係學堂畀黎架，你唔得就係唔得啦。」，然後就ban左我既application。
我諗牛頓都應該會畀佢地reject。
呢個星期青年新政發生唔少柒事，放錯風啦玩能源啦，柒到家姐都唔敢睇。好多人話想棄船，覺得青政信唔過，放風話投其他人或者白票算。
我信青政。我原諒青政既柒。初初畢業既人，最怕就係見到「最少兩年相關經驗」呢幾個字。究竟點先可以係個個都要兩年資歷既條件之下，搵到兩年資歷去應徵，永遠係一個謎。一間又想要新血新刺激又介意應徵者唔夠資歷既公司，到頭來應該都幾難請到岩既人。
香港人既政治潔癖嚴重，其實絕對可以理解——咁多年黎，我地畀人呃過幾多次？密室談判、臨陣改變立場、唔保護你仲反過黎話你、排斥你。我地有咩未畀人傷害過？久而久之，對舊政黨，我地唾棄；對新政團，我地懷疑。當普通人一聽到順豐快遞電話就會想收線時，唔想投一個實績經驗成疑既政黨，係好正常既事。而青政，就係一個冇經驗既政黨。青政成員有邊個喺青政之前已經喺政界社運界打響名堂？冇，一個都冇，頂盡一個做過城大學生會既巴治奧。青政就好似一個freshgrad咁，冇社運CV，冇政治實績（除左贏左一個區議會議席）（編按：當選後已退黨）。
但我會話呢個先係佢地可貴之處——對比起其他政黨，青政起個頭真係麻麻地，但咁樣反而正常。其他黨之所以一開頭順順利利，原因，係因為佢地班底仍然係舊人：公民黨、新同盟、工黨、LSD、人力，每一個都係有現任議員過檔而可以即刻上手；但問題係，呢啲政黨同樣遺傳晒舊政黨個種小圈子建制獨裁守舊既惡習；入得政界社運界內，就好難唔會變成城府極深既老油條，而我地反對大台既原因，正正就係因為厭倦左泛民既社運建制呢樣野。
我地要既係新政治，唔係換湯不換藥既新泛民；但數勻香港所有非建制派政黨，根本冇一個一開始真係由一班政治素人組成出黎。今日，泛民論述一潭死水，私心大過天，尚要我地無條件對佢地忠誠；因為咁，過去四年我地對政治失望。
青政係好難得冇呢種老人政治影子既政黨。係，佢地係零經驗準備不足，但我可以體諒。我接受呢一個因冇社運CV而產生既副作用，因為我情願要一個會做講錯小野既真心議員，都唔想要一個老奸巨滑既政客入去。前者我地可以百屌成材，後者會冥頑不靈。你情願要一個有其他舊人教點做既青年政黨，定係一個未有CV但肯聽你講跟你一齊學既政黨？
其實好多政黨都有迷失一沉百踩既時候。公民黨一開頭主打專業人土票源時成效不彰，後來發生菲傭居港權一案同五區公投，喺一片爭議聲中，佢地冇玩完，反而轉型搵到自己定向，然後喺2012年一舉超越民主黨成為泛民大户。公民黨未必個個接受，但你無法否定佢確實做到泛民既主流。昨日既公民黨，可能就係今日既青政；畢竟青政係本土派光譜之中，最有條件爭取主流民意投趨向本土既利器。但呢一切既前提，就係今日信任青政，保送佢入立法會鍛煉以待發光。
講完青政既柒點解可以原諒，咁點解要 #allin佢地？我知道好多人話buy本民前民族黨（既icon），但到得返青政時就唔想投畀佢地，即使本民前冇得選而全力支持青政都好，仍然覺得甚有保留，唔信青政。
我好憎含淚投票，我會因為陳國強畀人搞到選唔到而超區投白票，但我願意調整我既期望畀我個票青政。唔係因為我冇得揀，而係因為佢地代表住溫和本土派既未來。佢地贏，本土派就有希望將易入口既本土入屋，送入普通人既口中，話畀人知本土主義係可以多樣性，而唔係好似班左膠KOL口中所講既鳩衝；佢地贏，我地想講既話先可以透過立法會表達畀社會聽，話畀社會聽香港有未來；佢地贏，青政同本民前就可以透過議席畀佢地既資源同曝光，繼續運作，將本土派由無形化為實體。
反之，假如青政全軍覆沒，本民前同埋一眾新世代本土派亦難免受影響。係香港政治歷史上，幾乎冇一個政黨可以係零議席既情況之下維持到四年。雨革帶畀我地一次難道既機會，造就一代人行出黎；如今眼前既 #allinhk聯盟雖然未必係我地最理想既代議士人選，但蘇州過後冇艇搭，今日唔投畀青政，四年後想投佢又好本民前又好，都好難有得投。何必要因為今日既保守、錯失呢個機會而後悔？
我係一個freshgrad，每次搵工，見到個個招聘廣告都話要有兩年相關經驗，真係好灰。Freshgrad未必可以好似一個做左四五年野既人一樣咁熟手，但只要你肯畀機會佢、教佢，佢一樣做到，而且可以做得更加好。學野快係我地後生既好處，我相信青政亦都一樣。今日青政倉猝臨場上陣或者會準備不足，但點都為我地開左一扇門。他山之石可以攻玉，我地有四年時間琢磨青政呢塊璞玉。只要我地肯畀信心佢地，我相信佢地同所有freshgrad一樣都可以係改寫我城既未來。
我叫羅迅，今年廿一歲，Freshgrad。為左香港一個美好既將來，我會投青年新政。
（選舉廣告）
