（photo via cc Flickr user Jason Rogers）
我唔鍾意怪叔叔，對住任何人都笑笑口，表面上裝扮到好平易近人，但總係令人覺得怪裡怪氣，周身唔舒服咁。
Office就有一位咁既男同事，年約三十有多，出左名係好好先生，工作上既瑣碎事你要請佢幫手，佢會望實你雙眼幾秒，然後笑住話好。有時候，佢會成為我地一班較年輕妹妹既話題，結論就係「不能過於張揚咁避忌」，但適當時候一定要識講唔好。
「你地記唔記得啊？有次我地咪落樓下過對面馬路買飯，點知突然落大雨，阿怪（怪叔叔）咁岩有把縮骨遮係身，將我地一個個運送返黎既。」每次Rachel一提起呢件事大家就忍唔住大笑。「唔好再講啦，一男一女一把遮，大家又唔係咁熟已經尷尬，仲要哄個頭埋黎叫你唔好行咁出，隻手……feel到佢好似想搭我膊頭將我拉近啲，感覺好嘔心啊！」Amy立即激動起黎，「咩啊，到我個陣佢有掂到我膊頭啊！靚仔就話姐……佢咁樣真係俾人以為佢搏人懵，我以後死都會帶把遮係身架啦！」作為旁聽者既我又學到野，「小心啲啊，呢種人好麻煩，先當佢係真心幫人，如果你話佢，佢又覺得好心反而俾人罵，但從來無諗多一步人地想唔想咁。」
Amy點晒頭繼續講，「咪係，有時阿怪好好心機整左啲家常小炒返黎俾同事試，咁唔係樣樣都岩人口味架嘛，佢整過一次麻婆豆腐返黎俾我地試味，我say no話自己唔食得辣，唔知佢係咪以為我講客套說話，轉過頭佢用膠盒裝好晒放係我枱面，仲笑住話今晚可以拎黎做餸！咁局住都要收，唔通係佢面前倒左佢咩？」
唔少女同事遭遇過多多少少既「阿怪的故事」，一直唔出聲既Daisy終於開口，「我真係怕鬼左佢啊，成日唔聲唔聲挨係我個位。有時我擰轉面執拾地下啲file，一個轉身就見佢雙手逗住個頭，伏左係我個位既partition度，然後微笑住話「你好似好忙喎。」，完全係俾一個變態監視！仲要擔心自己烏低身執野個時有無唔小心走光……」我不禁代入其中，「咁都真係幾驚，最慘係你坐係佢隔離又走唔到。」，「唉，唔好講啦，放左工佢有打過比我呻公事添，好煩啊佢。」Rachel 拍拍Daisy 膊頭，「你唔好走寶啊，佢擺明溝緊你啦！哈哈！」Daisy個樣變得更苦，「佢知我有男友架，我男友見過阿怪張相覺得佢完全無威脅，仲話佢根本唔明香港女仔既喜好，做左乞人憎既野都唔知。」
阿怪有著典型會放暗箭既人既特質，你同佢講咩佢都保持可鞠既笑容，諗緊啲咩你根本捉摸唔到，得罪佢係好難搞，唯有盡量避免同佢有咁多接觸得黎，又唔好俾佢feel到你唔like佢。雖然我唔需要一個叔叔去保護，但點都好過有個怪叔叔惡意對待自己。
（編按：其實阿怪都幾好人丫～落雨遮埋你地～～）