我有一個女朋友，她非常小氣，經常呷醋，所以我暗中稱她為「小氣方丈」，剛開始拍拖時我已和方丈說得很清楚，就是拍拖後我還是會和其他女性朋友單獨外出吃飯，因為我和她們真的friend過打band，像兄弟一樣，而且為數不多，一隻手數得晒，只有四個，然後我逐一向方丈介紹她們每一個的背景，希望可以令她稍微安心一點。
「第一個是小學同學『肥妹』，唔覺唔覺已認識了十多年，要鐽著一早就鐽著咗啦係咪？第二個是中學同學『飛女』，她在英國讀書，畢業後也留在那邊工作，一年只會回香港一兩次，你唔係以為我會同佢Long D掛？第三個是大學同學『男人婆』，她是TB，已有一個很穩定的女朋友，而且我是絕對不會喜歡「男人」。第四個是前同事『Coffee』，有男朋友o架喇，所以你放心啦。」我氣定神閒地對方丈說。
「我都無話唔比你同女仔朋友單獨食飯，使咩講咁多我知啊傻佬，哈哈！」方丈笑說。
「我都係想你放心啲有多啲安全感啫。」我說，哈，原來是我自己多心，方丈一啲都唔小氣，只是我以小人之心度方丈之腹。
從前我差不多每個月我都會和這四個老朋友吃飯，不過之前太忙，差不多晚晚加班，有時間也想回家休息，現在過了旺季，非常空閒，當然要和老朋友聚聚舊，於是約了『肥妹』吃飯吹水，當然吃飯前已和方丈預先報告，因為我一直覺得二人相處坦坦白白會比較好，晚飯過後我亦立刻致電方丈。
「我食完飯返緊去喇，你食咗嘢未？」我問。
「你個朋友呢？」方丈無視了我的問題，並問。
「佢上咗巴士喇。」我說。
「你又知佢上咗巴士？即係你陪佢等埋車啦？然後佢返到屋企又會whatsapp你啦話今日好開心啦我已經返到屋企啦你唔使擔心啦下次再約食飯啦！」方丈怒吼。
「我搭地鐵佢搭巴士，但係同一個方向同一條路，咁咪順路同佢等埋車，吹多幾句，就係咁簡單。」我說，同時心裡開始有點不憤，為何吹多幾句水都好像犯下彌天大罪一樣。
「頭先仲吹唔夠？你可以同佢講話你要趕住返去陪女朋友傾電話唔得閒陪佢等車o架！」方丈大罵。
「嗯，好啦，我知喇。」我深呼吸一下，抑壓著怒火平靜地說。
點解我唔即時同方丈開火？因為聰明的男人是不會在此時此刻和女人來個辯論大賽，這樣只會「攬炒」，然後大家元氣大傷。你要知道，女人在發火時是不會跟你講道理，甚麼也聽不入耳，她最需要的只是認錯/認低威/安慰或擁抱，所以男人如果能控制自己情緒的話不妨先讓一步，但切記這絕不等同盲目縱容，正如此事一樣，其實我仍然覺得自己無錯，只是先讓步再討論和解決，而且最好盡快解決，絕不能拖，所以我已約了方丈明晚吃飯詳談。
女人鐘意抒發情感，所以我先叫方丈有甚麼不滿不快即管說，我會樂意做她的聆聽者，因為我想先聽聽她的想法，可是她說：「我無嘢想講。」嘭一聲把對話大門關上，我早知會如此，此時男人們絕不要放棄，可以提問式或氹小孩式繼續引導她去表達想法，「講啦講啦，實有嘢嘅。」「係咪嬲我琴晚送人搭車啊？」「快啲講喇吓你。」搞完一場大龍鳳她終於忍不住爆發：「你啊點點點佢又點點點仲唔係想點點點。。。」下刪一千字，很公平，她表達完便到我。
「其實兩個人相處最緊要講個信字，我話無嘢你點都話有嘢，咁我做乜都無用，而且要出軌其實好易，我乜都唔同你講，要瞞實瞞到，使鬼同你介紹佢地背景，又同你報告，我都係想你有多啲安全感你明唔明？而且我都同你講過，我係唔會因為拍咗拖就完全同我嘅女性朋友絕交，我都需要有自己嘅朋友圈。」我說。
「我唔係唔信你。。。不過。。。」方丈猶豫地說。
「我知，你覺得無安全感，咁我地一人讓一步，我盡量減少同佢地食飯嘅次數，唔同佢地等車，你又放寬啲你嘅底線，唔好因為我食咗一次飯就爆，好無？」我說。
「嗯。」方丈終於回復正常，然後我們睇戲食飯開開心心又過一日。
人的性格是經過長年累月所塑造出來，家庭環境、朋輩及感情經歷等都有所影響，所以方丈的性格當然不會單單因為上次和我討論完而改變，何況我也沒打算要改變她，只是希望大家能互相遷就。不久，她在我和Coffee吃飯時又爆發了，她因為我whatsapp有藍tick而不回覆而氣得火冒三丈，而實情時我不小心碰到電話，whatsapp就當我已讀訊息，我根本沒有看到，而且我和朋友（不論男女）單獨吃飯一向很少看電話，這是基本尊重，難道你要對方全程看著你按電話這麼沒趣？
其實每次和方丈開會討論都死不少細胞，更會說得面紅耳赤，「其實佢呷醋都係因為緊張你啫！」我知道一定會有人這樣替方丈說好話，當然，我也知道她是因為著緊我才呷醋，可是「著緊」唔係大晒，請不要以「著緊」為免死金牌，不要以為做盡一切無理之事然後隊個金牌出嚟就會無事。情侶嗌交是少不免的，因為每個人的價值觀都不同，當意見不一時便很容易有爭吵，不要以為忍氣吞聲或盲目認錯便能解決問題，最重要是好好溝通。願大家也能和自己的方丈好好相處，共勉之。