「我想要兩個手制坐埋一齊玩嘅Game。」

近期生活有點無聊，又不斷受到容總引誘¹，打算買部PS4返屋企同女友開心吓。雖然同女朋友打機係一個不智決定，因為就算你贏，佢一發脾氣你都係輸，不過亦無阻我買機決心。

去到舖頭我問老闆「有乜Game可以雙人合作？」我好執著要合作唔係對戰。

「大把啦，GTA都可以上網同人玩㗎。」

「我想要兩個手制坐埋一齊玩嘅Game。」

「咁…除咗無雙系列就無乜喇。」

「吓？炸彈人啊嗰類都無？」

「而家年代唔同喇，仲邊有人去另外一個人屋企打機㗎！」老闆真係一言驚醒洛克人。

回想起以前，喺一班同學當中，邊個屋企有部超級任天堂，嗰個人就係英雄！而我就係呢個英雄。幾乎每日放學都一定有同學黎我屋企打機，由於我係獨子，阿媽見有同學喺度又唔會出聲鬧我，所以每次我都無任歡迎。

以前就算無網絡，啲遊戲秘技總係唔知點解能夠傳遍整個宇宙，其中一個無可能唔識嘅秘技一定係『上上下下左右左右BA』，我諗如果無呢個秘技，《魂斗羅》我一世都未必爆到機。《龍珠超武鬥傳》只要輸入『上X下B左L右R』就可以用相同角色，等大家唔洗爭用悟空而兄弟相殘。

而第二個令我最自豪嘅秘技，就係用喺一隻要快速連按AB制嘅賽跑遊戲，起初我試盡無數方法，單用姆指隻人仲跑得慢過蝸牛，食指中指都係唔夠快，夾住姆指食指用指甲有次玩到我爆甲，最後有人教我用打火機！

將手制放地下壓實，再用打火機嘅底部瘋狂刮個AB制，遊戲入面隻人仔成支火箭咁衝過終點。

但係呢個秘技只適用於對住電腦，當你隔離個朋友都有打火機，就只能睇吓邊個刮得快。好彩我仲有一個必勝秘訣，就係用腳！

唔係用腳刮，而係一腳伸落隔離個朋友度，呢招好洗好用，幾乎適用於所有對戰遊戲，而且力度亦可以自由調節。但用得呢招多嘅結果係…

我畀朋友用火機燒我隻腳…

娛樂金魚眼我會用秀一，上日文問答題嘅堂，就會偷偷地按select變做電腦控制，任由呢個高材生自動答。如果你用不良牛？就算你畀電腦幫你答，佢都係會答錯…

當然，《娛樂金魚眼》嘅重點係閃避球同執貝殼，見住朋友被大浪衝走嗰種感覺真係不能言喻。

我唔係一個沉迷打機嘅人，不過有啲遊戲只要兩個人玩過，一個人就唔會想玩。

不過可能真係年代唔同咗，不過我覺得，就算上網連線可以搵全世界人玩，都不及一個朋友坐喺隔離玩咁開心。