（photo via cc Flickr user (M)）
「裸辭怕咩姐，你唔趁三十歲前去見識下，無機會架啦！」
「我個朋友過左去澳洲，成日係面書話識到黎自世界各地既人，日日去摘下蘿蔔啊，士多啤梨啊，不知幾快活。佢份兼職計番港紙時薪有八十幾蚊架，勤力啲既話，搵錢一定多過香港人工幾倍，真係正。」
「呢啲人生經歷好緊要架，去幾年番到黎個人唔同晒！英文又勁啲！」
大家七嘴八舌慫恿最怕醜既Assistant 阿勇出外去體驗人生，當然，日日屈住係四幅牆既框框裡面埋頭苦幹既打工前輩，想像唔到佢地有幾咁渴望去其他國家refresh一下，可惜即使無年齡限制，肩膀上已經有太多擔子。對佢地黎講，係遙不可及既夢，無機會去享受第二次人生，所以不停鼓勵阿勇嘗試去挑戰，學識獨立生活。
對阿勇黎講，係一個可追求既夢。佢有期待之餘亦有唔少謹慎既考慮，最現實係金錢上，屋企可唔可以資助到至少兩年既生活費之餘，仲要收少你份家用，會唔會好大負擔呢？如果問題已迎刃而解，就要為自己既事業著想多一步啦！想出去遊走一圈番黎搵長工既，最好計畫定一畢業就出發，盡情去放肆！由語言不通，四圍撲平價既住宿，同新相識既朋友仔膽粗粗係異國闖蕩搵兼職，再係每晚入睡前滿滿思郷之情同親朋好友網上視像訴說所有甜酸苦辣。難得既經歷同感受，真係可一不可再。
眼見唔少人出身一兩年後，了解到一份長工幾咁困身，就心血來潮想離開香港去個工作假期，不過通常都會被誤會係一個藉口想逃避，以為佢地承受唔到工作壓力就任性地放個長假旅行。職場上，好多時候係由大眾既諗法去主導，認為你突然quit左份工離開一段時間，咁你重投職場時，之前既工作經驗接軌唔到，大大打左個折扣，始終香港節奏急，變得快，要pick up番唔易。
最終阿勇選擇出走，去到澳洲仲不忘send相俾我地，話我地知沿途欣賞過幾多美景。佢話有心理準備搵工會有唔少阻滯，因為太多香港人過去變成自己人爭，本身係怕醜仔既佢逼住要豁出去，俾佢搵到一份宰牛既工，無睇錯，係宰牛。每日拎住把大刀將筋、骨、肉切割，幾個鐘頭望住流出既血水同聞著厭惡既氣味，為左金錢，同新相識既朋友互相支持頂硬上。你話如果得一個人，無多幾分既堅持，點可以笑住寬容面對？
打工度假唔係夢，只係呢個夢，需要你無限量既汗水同埋勇氣去實踐。