天津大爆炸：毒物污染可蔓延至北韓及俄羅斯東亞地區

睇天津大爆炸嘅片，第一時間就諗起Neon Genesis Evangelion第一集入面嘅N2地雷場面。當然喺動畫入面，Shinjin同Misato就乜事都無，喺現實上，我諗喺爆炸中心入面兩公里以內嘅人，可以肯定非死都重傷。

不過，What’s done is done。我哋要理解吓發生咗啲乜嘢事，同埋點善後。

首先，我哋要研究吓有啲乜嘢喺個倉庫入面。外電報導話個倉入面有氰化鈉（NaCN)，亦有鈣化碳（CaC₂)，亦有報導話有硝酸鉀（KNO₃）同硝酸鈉（NaNO₃），當中發生爆炸嘅應該係鈣化碳同硝酸化合物，不過最毒嘅係嘅氰化鈉，即係俗稱做山埃嘅劇毒化學品。

事發地點係接近渤海灣，當然大家會諗喺啲山埃會污染海水，呢個一定係事實嘅一部份，不過亦有可能有氰化物飄浮喺空氣，再由雨水帶落地面，呢個情況會更加可怕。據五名中國學者聯名於2013年所發表嘅論文所講，天津有7成食用水係來自地下水，而地下水源係由地面嘅雨水補充。即係話當呢啲化學物隨雨水滲入地下水源後，就會係天津地區真正災難嘅開始。

當然，風向亦有一定影響，我亦使用美國國家海洋及大氣管理局嘅HYSPLIT模型去分析於天津地區做起點，於未來10日於1m（紅），100m（藍），及500m（綠）高度嘅氣流軌跡。據預計，有關氣流會先向東北走向唐山，然後再經渤海北上入東三省，再經北韓入俄羅斯東亞地區。以上地區亦有機會被化學品污染。

有啲乜嘢可以補充？無，大家等睇爆鑊。