（圖為朋友下午茶食過嘅得半塊豬扒嘅豬扒包）
話說上年寫左篇《港大終極慳錢頹食攻略2014》，返學之後見到SU can多咗人叫off menu嘅頹食，令小弟老懷安慰，頹食後繼有人，可以放心畢業，離開呢個校園。但午夜夢迴，斯德哥爾摩症候群式念念不忘，總係放唔低對港大越頹越精彩嘅各式頹食劣食，所以決定今年再寫，從頹食角度逐間canteen點評一下。今次先寫SU Can。
舊莊月明變咗新莊月明之後，頹廢度大減，所以作為以前嘅頹食第二把交椅，SU Can近兩年已榮升為港大頹食之最。除咗晏晝仲有碩果僅存嘅「十仔」（已加價至$11.5）同off menu嘅單餸飯外，夜晚其實就係頹廢版大家樂。聽聞燒味唔錯但小弟冇食過，comment唔到。SU Can最大特色係有唔少off menu嘢，即餐牌搵唔到但又叫得嘅，而且因為餐牌上冇所以基本上唔會點加價。小弟自己知道嘅off menu食品如下：
1) 餐蛋麵配熱飲
供應時間：早餐及下午茶
價錢：$13.5（早餐）或 $14.5（下午茶）
同樣價錢配搭：腸、午餐肉、火腿、蛋──任選兩款 或 蕃茄肉碎、炸菜肉絲──任選一款
註1：麵份量為SU Can廚房所稱之「大麵」，用白色大碗裝，比黑黃色細碗嘅麵量大一倍
註2：新嚟嘅收銀有時唔識搞呢啲off menu嘢，可能會當咗你叫餐牌上面貴啲嘅麵餐，所以見到收多咗你錢嘅話記得同佢講
2) 西多配熱飲
供應時間：下午茶
價錢：$12
註：增肥之選
3) 淨西多
供應時間：下午茶
價錢：$8.8
4) 單餸飯
供應時間：午餐
價錢：$14.5
可加$3 配熱飲，嫌飯量唔夠可以拎餐時同裝飯個阿姐叫「多飯」。
註：食到你口寡寡首選
SU Can嘅晚飯可以話係最雞肋，大部份食品都過$30，雖然出面大家樂同樣嘢食貴多個開，但以SU Can質素食超過$30點都係有D唔值。唯一例外係午餐時有個即叫即整炒意粉，價錢$30-$33，鑊氣都叫夠，意粉都算入味，可以一戰。
總括嚟講，要慳錢頹食，SU Can可謂首選，從早餐、午餐到下午茶都囊括最頹寶座；之但係晚餐就稍為失色，價錢同頹廢度嘅比例有啲失衡。
有人話SU Can以前唔係咁頹，或者佢地都講得啱，記得小弟仲係freshman嗰陣，有人帶去食SU Can而小弟問點解唔食莊月明時，得到嘅回應的確係「呢間好食啲」。而且唔講唔知，SU Can之所以叫SU Can，因為佢以前真係喺SU Building地下（以前叫「徐朗星樓」），李國賢堂地下門口隔離，晏晝仲有茶飲有點心食添。黃克兢冇咗條紅梯但多咗間國殤之柱主題餐廳，仲要條國殤之柱變埋橙色，對小弟呢啲死老鬼嚟講，最有親切感嘅，或者得返三樓啲凸字……