唔經唔覺，臺港版《彩虹冒險》都執咗成七年。玩過online game嘅，都無乜人唔識呢隻，玩過嘅，腦中都應該有個「《彩虹冒險》島」。以前曾經稱霸Yahoo!遊戲榜第一，而家連韓國原廠server都消失埋，叫人不勝唏噓。
以下場景，相信大家都遇過，但只係冰山一角。我而家諗返，如果嗰陣時已經有《玩轉腦朋友》情緒專員呢類concpet，嗰陣時腦裡面嘅小精靈會點講？
1. 响房間流連或者打人打怪嗰陣，突然有隻白卡精靈仔經過，撞到佢之後就有五張白卡，仲要係x5……
阿樂：「熱烈地彈琴熱烈地唱……」
阿愁：「幻覺嚟嘅，幻覺嚟嘅，幻覺嚟嘅，幻覺嚟嘅，幻覺嚟嘅……」（咒語mode）
阿憎：「GM好＿孤寒，點解唔係x50、x500、x5000？」
阿憎：「又係水卡，有屁用？」
阿驚：「無事獻殷勤，攞咗係咪會中木馬㗎？」
2. 玩team play互片，你偏偏入唔到勁人嘅一隊。即使你要等高手同你一隊，你見到的都係好似火箭兵團「會隨著風出現又隨著風離開」嘅人。又或者勁人嗰隊有一個走咗，你想攝位但畀人捷足先登，或者因為攝位而畀人踢咗出去……
阿樂：「佢哋係見唔到我用外掛幫佢哋贏啫，唔同我一隊棧走寶，陣間睇你哋點死！」
阿愁：「我樣衰！我口臭！我無朋友幫！我唔啱玩《彩虹冒險》！嗚嗚嗚……」
阿燥：「DLLM你哋霸住個位阻住地球轉。咁想做長勝將軍，玩單機好過啦！正一白癡！」
阿憎：「佢哋同一個公會圍威喂洗積分，我哋識條鐵咩？」
阿驚：「個場得我一個等，唔通呢度有鬼？」
3. 你玩任務（唔理你玩普通任務定「不可能的任務300」）打大佬時候，個team得返你或者隊友一個，而且同大佬差唔多要死，當你／佢諗住可以贏，殊不知反被大佬班馬仔整死，一失足成千古＿……
阿樂：「呢個世界唔係你死就係我亡㗎啦，而家我哋捨身保住個boss條命，好包容好大愛，抵讚！」
阿愁：「班角色咁後生就走去死，轟烈過ISIS，佢哋個老豆老母實喊死，灰！」
阿燥：「頂你哋豬隊友喺度阻住哂，累到我攞唔到啲卡同錢，我唔同你哋玩啦！」（旺旺黑白配男仔mode）
阿憎：「你哋班大佬大隻核突又老積，唔抵得我哋嬌小玲瓏兼可以收到兵，唔好打啊笨！」
阿驚：「一見到隻嘢咁大隻，會唔會走出個mon叼走我哋㗎？？？」
4. 當你諗住想將8Lv裝備想合到最高的9Lv，兼且升咗做金卡，同用盡方法提高成功率，但偏偏合唔成，個裝仲變廢咗，認真大嘥鬼……
阿樂：「人生有好多個十年！」
阿愁：「算喇我天生都唔係合裝嘅好材料，呢個game咁多外掛佬，鬼叫我無用外掛升裝咩？及早離去好過。」
阿燥：「你條仆＿死GM，係都要針住我，搞到我次次都升唔到。乜你前世欠咗我吖？！」
阿憎：「個GM唔抵得我靚仔靚女啫！知你哋樣衰衰好自卑喇！」
阿驚：「嘩升唔到9Lv，儲唔到999裝（註：三款隨身裝備皆達到九級最高），啲人會唔會笑我㗎？？？」
親愛的彩虹冒險玩家您好:
在過去6個月期間，彩虹冒險小組努力向韓原廠Hanbitsoft爭取持續營運權，但因未能與Hanbitsoft達成共識，Hanbitsoft已決定不再續予台灣營運權。彩虹冒險小組很遺憾地正式向玩家宣布，歷經6年的《彩虹冒險》自即日起停止所有營運。營運小組雖然感到非常難過及惋惜，但還是要再度感謝長久以來支持《彩虹冒險》的玩家們。
至於《彩虹冒險》玩家剩餘的點數，將全數自動轉為APE點數，玩家可以暢玩APE旗下所有遊戲，包括《天傳》、《命運》和即將上市的《新童年》，我們將在今年下半年及明年持續引進更多遊戲以饗玩家，期望在未來的日子裡能持續有您們的陪伴，那將是我們努力的最大動力。
願祝您身體健康、萬事如意
彩虹冒險小組全體致上
5. 2008年8月26日，《彩虹冒險》臺港server壽終正寢，辛辛苦苦累積落嚟嘅成果通通無哂，大家個心真係穿咗個窿……
阿樂：「Hi Auntie！」
阿愁：「Hi Auntie！Hi Auntie！ 」
阿燥：「Hi Auntie！Hi Auntie！Hi Auntie！」
阿憎：「Hi Auntie！Hi Auntie！Hi Auntie！Hi Auntie！」
阿驚：「Hi Auntie！Hi Auntie！Hi Auntie！Hi Auntie！Hi Auntie！」