（photo via cc Flickr user Thunderchild7）
「頂！原來你企喺出面！等我仲喺入面等你，仲要掛住whatsapp望唔到我！有無搞錯呀！」Brenda憤怒地說。
「我覆緊公司嘢，電話又就無電，咁講咗朗豪坊正門等就正門等㗎啦，我有乜嘢做錯？」Mike無奈地說。
「你唔見我就應該打比我！公司啲嘢你遲啲覆使死呀？你知唔知我已經等咗你好耐！」Brenda繼續生氣地說，潑婦罵街也算這種。
「啱啱完event好多嘢要即刻follow up，而且頭先還返個差電比商場又晒咗啲時間。」Mike說，並心想她頂多都是等了十分鐘吧，平日我等她都不止。
「即係還差電嗰陣又溝女啦，唔係點會咁耐！」Brenda說。
「我意思係好多人排隊所以耐咗，其實我做嘢已經好辛苦好大壓力，平日OT，星期六日又要出event，你唔體諒不特止仲要一見面就鬧到我狗血淋頭，我真係唔_知你發乜神經！」Mike說，他不能再忍受這些莫須有的罪名。
經過一輪罵戰後，二人還是深深不憤，但拖還是要繼續拍，梗係啦，唔通返歸咩？於是他們隨便進了一間日本餐廳，有人說吃朱古力會令人開心，於是Mike點了一個心太軟，Brenda則點了一杯咖啡，二人默言不語，瀰漫著沉重的氣氛。
「好無味呀個心太軟？」Mike嘗試打破尷尬的局面。
「而家食龍肉都無味啦！」Brenda說。女人有時就是這樣，明明男人都給了下台階，還是得寸進尺，越踩越上，毫不讓步。
「我明你嬲咩，下次我到咗唔見你就打咗比你先，好無？」Mike說。有時男人亦很聰明，知道爭吵下去亦無意思，幹脆快快手道歉了事。
「咁係吖嘛，其實我鬧你都係關心你，我想你知呢份工咁辛苦根本唔應該再做落去，我鬧你都係錫你咋！即係好似屋企人咁，越親咪越緊張，緊張咪鬧囉！」Brenda說。
「WHAT THE FUXX!?」Mike說。他最後還是忍不住爆了。
其實以上只是一件小事，人與人之間有誤解是正常不過，其實只要Brenda脆脆哋講句：「唔好意思呀我唔知你趕緊公司嘢，我都係想快啲見到你咋。」然後再加個深情擁抱，相信大部份男人都已經嬲唔落，仲會笑笑口話無事，之但係你唔認錯仲要講一大堆無理藉口的話，只會是火上加油，唔爆就奇！
除了情侶，其實同事間亦經常出現這種情況，例如Manger問Junior為何入錯data，Junior說因為Senior沒有brief清楚，而不是承認自己的不小心；Manger問Junior proposal做好未，Junior說因為Senior叫她做budget，所以還未有時間做proposal，而不是承認自己分配時間方面出了問題。錯就要認，打就要企定。看似簡單，卻很少人做到，特別是政客，經常以一大堆無理藉口來掩飾自己的無能，日日派花生，比TBB的鬧劇更鬧劇，令人越看越火滾。
至於家人理論，我當然明白，就是對越親的人便會越放肆，因為你知道無論你點鬧佢點衰都好，佢都一定會原諒你，就正如上班時你對著老闆是一隻笑口哂哂的哈巴狗，回家對著父母卻是狼狗，兇神惡殺，阿媽問多你幾句就嫌煩亂咁吠，發脾氣。其實無論是對另一半或父母，都應該有基本尊重，有時在街上看到有小朋友打父母，或串串貢話父母死蠢、白癡，我都覺得很不應該，換轉是以前的我，一定比人鬧死。更重要的是，請不要再以「錫你」、「緊張你」或其他藉口為名去為所欲為，無理取鬧了，這樣只會令人更生氣。