（photo via cc Flickr user Chris Hunkeler）
若干日子之前，寫了一篇文章，批評一些人講野話不著邊際，冇內容。
有人看完這篇文章之後，會覺得筆者嘅用意純粹在於宣洩對這些人嘅不滿和憤怒。有人回應：「寫文章這個人一定冇朋友。」或者「人地返工都係都係想hea啫，你估真係想識你咩」 啲人似乎以為我好想同同事做朋友。因為人地冇興趣同我做朋友，我就覺得失望喇。我當然冇興趣同廢噏嘅人做朋友。我冇興趣，唔係因為我反社會，唔係因為我孤僻。正如村上春樹講過：「沒有人喜歡孤獨的，只是沒有什麼人喜歡孤獨的，只是不勉強交朋友而已，因為就算那樣做也只有失望而已」。
但我文章嘅重點並唔係，我喜歡交咩朋友，同我唔喜歡交咩朋友。有啲人會話：又冇人逼你同人地做朋友，好好地做咩話人啫？散播負能量。其實唔係我專登要散播負能力架。如果我對呢啲廢噏嘅人嘅感覺純粹係憎恨，我諗我都會覺得輕鬆好多。其實呢人都係返工見啫，我又唔係點使OT，返足full time都係對得個8個鐘，我起碼仲剩飯一日嘅三分之二係做有意義嘅事嘅。我又何苦寫篇一千字嘅文去罵呢人呢？ 其實對住呢啲人，除了厭惡，更多嘅感覺係「哀其不幸，怒其不爭」，其實你講廢話，真係take up左你人生寶貴嘅幾秒，呢幾秒已經足啲你做一啲比較有意義嘅事，例如睇一段需要你關心嘅新聞，了解一下身邊你想了解嘅人，甚至幫手聯署呼籲ACI，IATA，ICAO徹查梁振英濫權。所以我話，原本好好地一句早晨兩個字，講成「哇，flora你條裙好靚呀，so cute，i love it」十三個字，係浪費時間。況且你日日都讚，人地著咩你都讚，你覺得人地會覺得你有幾真心呢？你事實尚又有幾分真心呢？依家唔係你想唔想同人做朋友嘅問題，係就算你決定唔同其他人做朋友，你都可以選擇唔用虛偽嘅寒暄代替真正嘅了解；就算你唔想了解其他人，你都可以用本來用黎講廢話嘅時間，做一啲對呢個社會有貢獻同建設性嘅事。
子曰：「群居終日，言不及義，好行小慧，難矣哉！」 好多人鍾意講，講下啫，使唔使咁認真呀。 潛台詞就係，小小事都要思考半日好辛苦架。潛台詞背後嘅，就係反智精神，將思考定位為辛苦嘅，辛苦就係不可取嘅。其實好多人，真係寧可做快樂嘅豬，唔想做痛苦嘅人。 依家吹下水都唔得呀？好似有人話孔子「道德嚴格主義，必須時時刻刻進德修業，連閒扯淡都不可以，似乎不盡人情。」 唔係唔得，不過可唔可以唔好日日呢？費噏嘅份量可唔可以減少啲呢？其實你明知呢啲野對你唔好架，就好似食薯片熱氣，或者叫你完全唔食會好痛苦，但食少啲呢？可唔可以呀？
又有人話：大家崗位唔同，唔通要傾工作，傾政治你又中意咩？認真同有建設性嘅話題遠遠不至於政治，其實就算你講娛樂，都可以有建設性啲咁去講，可以唔止著眼於感官（sensation）上（e.g. 宋仲基好靚仔呀！），而唔怕去講你自己嘅觀點（e.g. 點解Viu TV聞矛盾去旅行揀呢啲 pair ups去做呢，pair up鄧紫棋同鄧麗欣好似好睇過連詩雅同葉蘊儀喎，因為若干年前gem鬧過鄧麗欣唱歌廢)。人點解會「終日言不及義」？就係因為冇自己嘅觀點，亦對人地嘅觀點冇興趣。唔好同我講呢啲人可能私底下好有深度，你都唔會同我講好多有深度（被標籤成會講政治）嘅人會日日聽K pop 啦？ You’re what you think, what you speak and what you do. 我地一日只有24個鐘，你關心嘅人，其實真係反映係你口中講嘅野，亦反映緊你個人嘅價值。所以愛默生講過： Watch your thoughts. They become words. Watch your words. They become deeds. Watch your deeds. They become habits. Watch your habits. They become character.
人生係你嘅，你要點樣選擇，人地係無緣置喙。但今天思考上嘅怠惰，有後果都要自己孭番。正所謂，古乳有暈，「條路自己揀，仆街唔好喊。」唔用腦就唔好怨自己點解越變越蠢喇。 講到政治討論，政治討論源於觀點，好多廢噏嘅香港人，其實根本唔會思考，唔好話冇觀點啦，應該係講冇經過深思嘅觀點。香港，離開公民社會，仲有慢慢長路。想推廣公民議政，不如先推行全民思考，每日做大腦運動10分鐘先啦。