（photo via cc Flickr user shots of carmen fiano）
每個人都失過戀。
每個人都等過人。
我都唔例外。
好多年前，分手前嘅最後一段日子，佢竭盡所能想擺脫我，用盡最荒唐嘅理由，最唔耐煩嘅語氣，最涼薄刻毒嘅說話黎令我放手。我諗左十個唔應該分手嘅理由，都敵唔過佢一句想冷靜下。
然後我諗，可能佢真係需要時間諗下我地要點行落去，我等緊一個offer，到時我唔會有任何異議，做得唔夠，我可以努力；做得唔好，我可以改。十六個字，義無反顧咁去做，有咩可以難到我地？當時，我真係咁諗。
直到廿一日冷靜期過左，我諗埋第十一至七十三個唔應該分手嘅理由，想搵下佢，電話已經打唔通，Facebook無啦啦少左個朋友，我好慌張，拎起電話send左個whatsapp message。
從個剔號知道，原來佢想靜下，同埋想我冷靜下，原來佢將兩句溝埋左黎講。
然後我周身唔舒服，好似抖唔到氣咁，好想搵佢。但兄弟又叫我唔好繼續搵落去，免得佢對我愈黎愈厭惡。於是食又唔係訓又唔係，煩佢又更加唔係。呢個時候，見證友情最可貴嘅部份。
一個電話，八方支援，黎開解，黎陪我借酒消愁。
「忍下啦，開頭係辛苦啲，幾年後回想返，就會覺得自己好傻架啦。」三姑六婆同各位兄弟一齊為我打氣，我彷彿好似參加緊戒毒療程咁，啤酒變成美沙酮。
朋友變成戒煙貼，每次頂唔住，我就打比其中一個朋友，唔停咁講足個半鐘。去證明我真係無左佢唔得，去證明我要等到佢返黎為止。
力排眾議嘅愛情係浪漫嘅，我覺得，大家可以唔認同，甚至佢可以唔記得我，但我唔可以比自己慢慢淡忘。換句話講，等待同時間決鬥，而我默默班緊救兵──直到佢返黎為止。
等人之所以咁辛苦，在於生理同心理處於靜止狀態，周圍嘅事物一直郁動，焦慮同煩躁無時無刻交替襲擊，等運到嘅感覺好可怕，更可怕嘅係，我唔知要等到幾時。
等左一年，我仲好有鬥志咁改善自己，務求再見到佢嘅時候，佢會後悔自己點解當初咁武斷。
等左兩年，我開始諗，咁耐無見，如果有機會見面，第一句開場白，到底講咩好？一定要有種久違嘅瀟灑氣概。
等左三年，我發覺對方Facebook profile picture已經轉左十幾次，甚至同當初嘅第三者分埋手，都無聯絡過我。
自作多情得耐，當要面對客觀事實，我好慌張。
「其實我忘記唔到佢。」我好徬徨，急需兄弟姊妹貢獻能量，話比我知，我由此至終都無做錯到。
「佢？兩年定三年前？好耐啦喎。」當初誓神劈願話陪我共渡時艱嘅老死，忽然好似患晒失憶症咁。
當朋友都開始無左件事，孤身奮戰就更加辛苦，特別我好清楚知道當事人根本無放我喺心。一個人嘅鬥志，堅持到三年，已經難能可貴。
但我開始覺得，可能我同佢緣份太薄，呢世都唔會再做得返情侶。
結論黎得好遲，但我依然諗緊點樣去逆轉一場命運──分手等於永別嘅命運。
好少人會咁比喻，個個人都覺得，兩個人一齊係命運整定，我覺得咁天馬行空嘅想法得女人先諗得出──因為唔洗你出力追嘛！我花左幾多心思去扮天造地設，你知咩？
不過都未必係錯嘅，如果一齊係命運，咁男人係設計命運嘅神囉。
現實啲講，廿五歲之後嘅愛情，生活上無同學同事嘅關係強迫見面嘅話，基本上，分手等於永別。時間會慢慢將所有人推向呢個命運，少有例外。
如果要同命運作對，好多時，知道搵對方未必有好結果，你只能夠選擇等。等到半途，我發現，全世界人都向前行緊，得返自己企喺原地，咁所有人就會離我愈黎愈遠。
咁我願意等待嘅鬥志，應該叫積極定消極？
今年第六年。
「你覺得，我應唔應該搵返佢？」有次酒局，我當眾問我所有兄弟。
「……」鴉雀無聲。
當一個話題由熱變暖、暖變冷、甚至令周圍嘅人唔識比反應嘅時候……我最愛嘅人，可能已經唔記得我。
就算我幾愛都好，或者，好有可能，呢世都唔會再見得返。