（photo via cc Flickr user Global Panorama）
記者，一個奇怪嘅行業。用麥太直線邏輯，讀得新聞系就會畢業做記者。而偏偏每年都有唔少成績幾好嘅學生入讀新聞系，理由不外乎實踐抱負、擔起使命、「走在事實最前線」好型，之類。
記者，一個付出與回報不成正比嘅職業。《明報》前總編輯劉進圖而家係捍衛新聞自由嘅代表之一，但佢幾年前同陳惜姿就初出茅廬嘅記者人工微薄一事起爭議、予人刻薄員工嘅形象，又唔知有幾多人記得。幾年過去，記者入職薪酬，又好似冇點變過。
記者，一個孤芳自賞嘅職業。寫文嘅會感嘆自己一份稿雕琢幾耐，用字有幾精煉；編輯會為起條好題、排個靚版而自豪一番。但對讀者嚟講，通常都係不知不覺。睇網上版新聞的話，就更加唔好講咩版面配置。
記者，一個近似恐龍嘅瀕危行業。未有 iPhone之前，資訊流通速度冇咁快，讀者睇尋日嘅新聞理所當然。今時今日，人人欲練神功拎起 Smartphone，交通意外、火燭爆炸，總有一個市民喺左近。任突發記者手車再快再辣，都始終慢人一步。資訊不對稱嘅時代過去，記者壟斷資訊、「我寫嘢你要睇、我講嘢你要聽」嘅現象扭轉，仲憑乜嘢叫人買份報紙落下廣告？
記者，一個主動變被動嘅行業。政府以前開 press con ，記者負責問問題，轉數高、反應快嘅行家可以打蛇隨棍上。而家高官出嚟自說自話之後轉頭就走，一時開吹風會引導輿論，一時寫網誌請君入甕。就連以前可以勾線嘅警察、消防無線電都數碼化埋，突發記者固然難以快過差人到場，唔好彩隨時等清晒場、發埋稿先知有事發生。
記者，一個被迫上梁山，非變不可嘅行業。沉迷支筆有幾秀麗、行文有幾流暢、幾咁刻苦耐勞已經別無意義。唯有尋求新嘅定位，為讀者創造價值，先會見到轉機。呢頭壹傳媒紙媒衰落，嗰邊經濟日報業務蒸蒸日上。原因？人哋定位清晰，專門做經濟新聞，政治社會新聞次要，對準目標廣告客戶、建立入門網站如《經濟通》及《地產站》鞏固讀者群。
記者，處境未及王維基坎坷。香港電視免費電視牌照發牌無期，拍劇燒銀紙難以持久，王維基忍痛 hold up 節目製作，全力發展網購業務，以期養大現金牛供養電視營運，擺脫廣告商制肘。成敗未知，但王維基轉型在先，記者前車可鑑。
記者，必須追求深度、追求專門嘅行業。唔好鬥快， Facebook 同高登一定更快。唔好鬥多， Google一定更多資料提供。要鬥深，要深耕細作，發掘尋常人不為所知嘅真相。要鬥專，要專心致志做某一個範疇，長尾理論話齋，喺互聯網時代，固定成本近乎零，越有條件做得更 niche 去迎合某一小眾。
記者，需要可持續發展嘅模式。文人辦報時代已成過去，老闆唔係開善堂，要睇住盤數。有資深傳媒人用 crowd funding 方式start up 通訊社做深度調查報道，係正確嘅方向。錢籌咗返嚟，係成立基金令養滾錢，抑或好似誠品同百老匯電影中心咁拉上補下，大家各師各法。但肯定唔係累鬥累燒銀紙、講抱負拋頭顱灑熱血或者哀悼「新聞行業最黑暗嘅一天」。The worst is yet to come.